العناية بالاظافر و اليدين

اهلين حبيباتي موضوعنا اليوم شوي غير و هو عن هوسي السري

"العناية بالاظافر و اليدين"

مدري ليش ما تكلمت عن الاظافر من قبل لان عندي هوس مو طبيعي بالعناية و الشكل الكلي لليد يعني لو انكسر اظفري يسير همي هو بالحياة ههههههههه

اليوم بقول لكم عن نصايح جربتها و نفعت معاي و روتيني البسيط بعنايتي بيدي

نبدى بعناية اليد اهم شي هو الترطيب و التقشير و الحماية

:الترطيب -

احرصي انك ترطيبين ايديك بأستمرار هالشي مرة مهم لتوحيد اللون و نعومة اليد و كمان احرصو انكم تستعملون كريم خالي من العطور و فيه نسبة حماية من الشمس عشان لما تروحون للجامعة او الدوام تحمون يدكم مثل الوجه من التعرض للشمس عشان التصبغات و الاسمرار 

عندكم خيارات مختلفة من بودي شوب, كلينك, نيتروجينا, و بالصيدليات الكبيرة زي وايتس و بوتس ممكن تطلبون كريمات حماية من الشمس و طبية 

:التقشير -

كثير منا يغفل عن هالنقطة لكنها مهمة لأزالة الخلايا الميتة و الجفاف خصوصا ان يدينا تتعرض لكثير من العوامل الخارجية من شمس, ممكن اعمال المنزل, و الاشغال اليوميه فضروري تقشرون يدكم اسبوعيا او مرتين بالاسبوع في مقشرات جاهزة بالسوق عند بودي شوب و لش و سالي هانسن و اي هيرب و ممكن تستعملون مقشرات الجسم عادي او تسونه بالبيت

بعطيكم خلطة سريعة

 سكر, زيت جوز الهند او زيتون اللي تبون, و ليمون

زيت جوز الهند بيرطب و الليمون يساعد على التفتيح و توحيد اللون و ممكن بعد السكرب تاخذين بقايا ليمونة معصورة او حتى باي وقت تستعملين يمونه لاكل و تفركينها على ايدك و تخلينها 10 دقايق او الين ينشف و بعدين تقشرين او تغسلين يدك و مع الاستمرار بتفتح يدك

صحة الاظافر

الاكل اكيد يلعب دور لان التغذية الصحيحة هي اللي بتحسن من قوة اظافرك, ركزي على شرب الموية و الحليب و كثري من الفواكه و الخضار خصوصا الطماطم و البروكلي و الجزر و الجرجير و ممكن تاخذين مكملات غذائية 

الحين نجي للعناية

ضروري ترطبون الاظافر و الجلد اللي حولهم لان لما يترطب مكان منبت الظفر يكون اقوى و اقل عرضة للتكسر و الضعف و هالشي صدق عن تجربة انا اظافري كانت تطول بس مشكلتي الاساسية هي الضعف كانو على طول ينكسرون من اي شي بس لما بديت احط عليهم زيوت و ارطبهم لاحظت انهم صارو مرة اقوى و أصح من قبل , بعيدا عن المناكيرات المقوية لاني ما اثق بنتايجهم هم بس ينحطون فوق الظفر و نمسحهم بالمزيل عشان الوضوء فما في منهم فايدة فعلية لظفرك انما النتيجة مؤقتة بس وقت وضعه على الاظفر و هالشي لاحظتة مهما جربت انواع مقوية طول ما هي على ظفري يكون قوي و من اشيلها يجع زي ما كان لان من الاساس اظفري مهو قوي او مترطب من الداخل

من الزيوت الرائعة لترطيب الاظافر و تقويتها هي زيت اللوز, زيت التي تري , فيتامين اي, و زيت جوز الهند انا احطه مرتين باليوم و خلال اسبوع لاحظت الفرق اظافري طولوت بسرعة و بشكل قوي جربو و بتدعون لي

برد الاظافر - 

في انواع مختلفة من مبارد الاظافر خلينا نتكلم عنهم و عن طريقة البرد الصحيحة

 نجي للنوع المنتشر يكون عبارة عن خشب نحيف او ورق مقوة و عليه ورق الصنفرة بس بدرجات مختلفة بعضهم انعم من غيرهم. كل ما كان انعم فهو احسن لصحة اظافرك, عيبهم الوحيد هو انهم يخربون بسرعة لان مع كثر الاستعمال ينكسر بسهولة و تخف قوة ورق الصنفرة

يجون بعدة الوان منها احمر و اسود

المبرد المربع: هالنوع كمان منتشر و يوفر لك اكثر من نوع في شي واحد, بالعادة يحتوي على نسب مختلفة من ورق الصنفرة من الخشن للناعم و بالعادة يكون مرقم عشان تعرفين من وين تبدين, هالنوع كمان كويس للاظافر و ما منة ضرر

المبرد الزجاجي: مو منتشر مرة بس هو من مباردي المفضلة لانه مسوى من غبار الكرستال و ناعم جدا على الاظفر و يسهل البرد بشكل نظيف و يساعد على تشكيل الظفر بدقة و ما يخدش سطح الاظفر او يضعفة, ممكن ينكسر بسرعة لانه بالنهاية زجاج و مع الاستخدام المنطقة الخشنه المخصصة للبرد تروح بسرعة. تلقونه بسيفورا و وايتس

المبرد الحديد: اكثر نوع منتشر للأسف و هو جدا سيء للأظفر لانه الحديد قوي على سطح الظفر و يساعد على تكسيرة اذا بتستخدمينة لاظافر تركيب فهو كويس لانه قوي فيشكلة بسرعة اما للاظفر الطبيعي فهو جدا ضار لا تستعملونة

 

طريقة البرد الصحيحة
هالنقطة مهمة مرة بنات و ضروري تطبقونها عشان يظل اظفرك قوي و صحي و ما ينكسر بسرعة, انا ما كنت انتبه لهالشي بس لما غيرت طريقتي لاحظت الفرق لاني احب ابردهم بشطل بيضاوي او لوزي و كانو بسرعة ينكسرون

الطريقة هي انك تبردينهم على اتجاه واحد, لا تروحين و ترجعين بالمبرد لان كذا تخدشين سطح الظفر فينكسر منك بسرعة

نفس الصورة و شكل السهم

بالبداية تحسونه غريب شوي و ممكن ياخذ منكم وقت اطول بس بتتعودون بسرعة و
 اصح لأظافركم و يحافظ على طولهم و لا تضغطون بقوة على المبرد و انتي تبدين

لما تجين تبردين اتأكدي ان اظافرك ناشفة مو مبلولة لانها تضعف لما تكون مبلولوة و حاولي ان يكون شكلهم مربع او بيضاوي هالشكل ما ينكسر بسرعة, كل ما نحفتي الاطراف زادت نسبة الكسر 

:كيف تنشأين روتينك الخاص و ايش الخطوات
اول شي جهزي كل اغراضك بمكان واحد يا بوكس او سلة او درج عشان ما تنسين شي
 (بتحتاجين (مبرد, فرشاية بديكير, مقص اظافر,مقشر و مرطب

اذا كنتي حاطة مناكير بقولكم طريقتي بأزالته و ايش اسوي بعدها

المزيلات انواع و اشكال انا افضل مزيل سيفورا, بودي شوب لان فيه زيت اللوز و مزيل من دايسو يكون مشبع بقطن و خالي من الاسيتون و يرطب الاظافر ابدا ما تكون ناشفة من بعدة

بنات بخصوص الاسيتون بغيت اوضح لكم شغلة هو عبارة عن مادة كيميائية تحلل او تذيب المناكير عشان ينشال بسرعة و حتى المزيلات الخالية من الاسيتون فيها مادة من مشتقات الاسيتون فما نكون طلعنى من عائلة لاسيتون اساسا, محد ينكر انه ينشف الاظفرو الجلد الي حوله و الاظافر الناشفة تنكسر بسرعة عشان كذا يقال انه ضار

 الاسيتون مادة قوية و ممكن تذوب البلاستيك و البعض ينصح بنقع الاظافر التركيب فيهم عشان تنفك بسهولة لكن طول ما انك تغسلين ايدك مباشرة بعد ما تشيلين المناكير عشان تتخلصين من بقايا الاسيتون فأنشاءالله ما في ضرر. اذا كانت اظافرك اساسا ضعيفة و بحالة مو كويسة استعملي مزيلات مكونة من مواد طبيعية او اقل حدة مثل مزيل دايسو و سيفورا و بودي شوب عشان ما تتعبينهم زيادة لكن لو انتي تستعملين الاسيتون و اظافرك حالتها كويسة فعادي ما منه ضرر

بعد ما شلتي المناكير و غسلتي يدك من بقايا الاسيتون ابدي ابردي اظافرك بنفس الطريقة اللي كتبتها فوق و خذي وقتك الين ما تحصلين على الشكل الي تبينه

بعدين انقعي يدك بموية دافية و صابون لخمس دقايق و دفي او حركي الجلد اللي حول اظفرك على ورى شوي بأستعمال الاداة الخشبية لا تسوينه بقوة او تدفين الجلد بزيادة و ابدا لا تقصون هالجلد لان ما يجي من وراه فايدة قصة هو لهدف تجميلي فقط, جلد الكيوتكل يحمي الظفر من البكتريا فلما تقصينه يسير الظفر مكشوف و اكثر عرضة للالتهابات و البكتيريا, دفيه لو حابة تزيدين من مساحه اظفرك

الحين يجي دور المقشر يا شي جاهز او الخلط اللي قلتها لكم و جيبو الفرشاية الخاصة بالبديكر و نظفو منطقة الظفر و اللي حولها كويس

نشفي يدك بعد ما تخلصين و رطبيها باي كريم ترتاحين له و كمان رطبي اظافرك و الجلد الي حولها باي زيت تفضلينة و بكذا  نكون انتهينى من الروتين و حصلتي على يدين و اظافر ناعمه و مرتبة ممكن تتركينهم كذا او تحطين مناكير

حاولت ان الروتين يكون بسيط و خطواته قليلة مو شرط تروحين لمشغل او تسوين مليون خطوة و تستعملين منتجات كثيرة عشان تعتنين بأظافرك جربي تسوين هالحركة اسبوعيا و شغلي لك شموع و روقي اهم شي تدلعين نفسك


ان شاءالله استفدتو من هالتدوينة و عطيتكم معلومة جديدة , لا تنسون تشاركون البوست مع مهووسات الاظافر

magic box ماجيك بوكس من فانيلا

اهلين بنات ان شاءالله ان كلكم بخير 

موضوعنا اليوم عن الماجيك بوكس من فانيلا راح اشاركم محتويات بوكس هالشهر و فكرتة بشكل عام

ايش هو ماجيك بوكس؟

فكرتة زي كل البوكسات اللي انشهرت بالفترة الاخيرة, عبارة عن اشتراك شهري و يوصلك 4 منتجات من الماركات اللي توفرها   فانيلا اختبار صغير تختارين فيها اولوياتك و ايش الماركات اللي تحبينها الحلو ان البوكس ما يقتصر على شي واحد فيجيك منوع من مكياج,عناية,عطور, احذية او حتى ملابس

لمعلومات اكثر عن البوكس و التجربة بشكل مجاني ادخلو هنا 

ماجيك بوكس لهذا الشهر

الحين نجي لبوكس هالشهر و هو كان دعم للمنتجات المحلية يعني كل شي كان مصنع او مبتكر من السعودية

البوكس يجي بشكل مرة مرتب و كل منتج علية بطاقة صغيرة تعرف عن الشركة و المنتجات اللي توفرها

محتويات كانت متنوعه و الحين بوريكم اياها عن قرب 

 اول شي شد انتباهي هو فوطة "اللمسة السحرية" لازالة المكياج و كريم وجه من ماركة اسما "بريز"مناسب لجميع انواع البشرة ريحتة ورد و قوامه سيلكوني 

ثاني شي هو مجموعة اظرف عليها تصاميم عربية حلوة من ماركة اسمها عذوب

ثالث شي هو كتاب "طيب من فنجان موجود داخلة 50 عمل ايجابي عشان تسوينهم و توثقين هالاعمال, جدا حبيت الفكرة انك تسعدين نفسك و غيرك بأشياء بسيطة و تخلينها عندك عشان تتذكرينها و عقد بسيط و ناعم من دوري شوب

شكل الكتاب من الداخل - الصورة من موقع فانيلا 

و اخر شي هو بيت مخدة من مطر, خامتة كويسة و جودتة عالية عجبني كيف اخذو شي تقليدي و حولوه لمنتج بسيط و انيق

هذا كان كل شي ببوكس هالشهر, زي ما قلت لكم كل المنتجات بتلقونها على موقع فانيلا

قولو لي رايكم بالبوكس و هل ممكن تشتركون فيه لما يتم الاعلان عنه؟

سلسلة الاساسيات: كل شي تحتاجين تعرفينة عن الفاونديشن foundation basics

اهلين بنات انشاءالله كلكم بخير

موضوعنا اليوم بيفيد المبتدئات اكثر شي, بكتب لكم عن كل شي يخص الفاونديشن من الاندرتون لطريقة الاختيار  للانواع الموجودة بالسوق و الانسب لكل بشرة فجيبو قهوة او سناك لاننا مطولين شوي

اول شي خلينا نبدئ بالاندرتون, اذا عرفتو الاندرتون حقكم بيسهل عليكم اختيار الدرجة اللي تناسبكم مو بس بالمكياج حتى تقدرين تعرفين درجات الالوان اللي تناسبك باللبس, الاكسسوار, و حتى الوان صبغة الشعر اللي تصلح لك

ايش هو الاندرتون؟ هو اللون او الالوان اللي تحت سطح البشرة و تظهر بنور الشمس او الاضاءة القوية زي لما نقول ( هذي بشرتها على صفار او خضار او حمراء احنى هنا نتكلم عن الاندرتون)  و الطريقة سهلة

 كل اللي عليك تسوينه هو انك تروحين لاي منطقة انارتها عالية او اعتمدي على نور الشمس و شوفي يدك 

اذا عروقك كانت خضراء او تميل الزيتوني -

بشرتك فيها لمحه صفار او مشمشي -

تبرز عليك المجوهرات الذهبية اكثر من الفضية -

ما تحرقك الشمس بسهولة -

 بشرتتك متوسطة تميل للسمار -

يعني انتي اندرتونك دافي ميلي للاساس اللي يكون على صفار و ابتعدي من اللي يميل للزهري لانه ممكن يبهتك او يبينك رمادية

  و ما فيك حياة و هذا نوع اغلب البشرات الخليجية و العربية

اذا عروقك تميل للازرق او البنفسجي  -

تنحرقين بسهولة من الشمس -

بشرتك تحمر بسهولة -

المجوهرات الفضية تبرز عليك اكثر من الذهبية -

بشرتك تكون فاتحة اكثر الاحيان -

فأنتي اندتونك بارد و يناسبك اي اساس يميل للزهري او محايد  

اذا صعب تميزين بين الالوان و حسيتي ان فيك زراق و خضار -

سهل انك تسوين تان -

بشرتك ما تحمر ولا فيها صفار -

كل المجوهرات (فضي او ذهبي) يبرزون عليك -

فأنتي اندرتونك محايد و يناسبك اي شي سواء على صفار او وردي

بعد ما عرفنا الاندرتون خلونا نشوف مسمياته بالفاونديشن

هالصورة بتختصر الكثير, زي ما انتو شايفين بأول قسم تظهر بعض الكلمات الاساسية اللي نشوفها بأسماء الفاونديشنات 

  sand , caramel , warm , honey , bronze , peach , tan , earth مثل  

هذي المسميات هي دلالات بسيطة ان هالدرجات بتكون الوانها دافية او مايلة للصفار فتناسب اللي اندرتونهم دافي 

اما الجزء السفلي دلالات الالوان المناسبة للبشرات اللي اندرتونها بارد

satin,  fair ,rose, neutral, beige

الحين فهمنا الاندرتون و الدلالات بالأسامي نجي لاختيار الصحيح للون الفاونديشن 

بس قبل ما ابدى حابة انوه عن شي صغير و هو سؤال متكرر كثير (ايش افضل فاونديشن؟) هالسؤال يجلطني ههههههههه

لان ما في شي اسمه افضل فاونديشن ليش؟ لان كل بشرة تتقبل الفاوديشن بشكل مختلف حتى لو كنا من نفس نوع البشرة ممكن انا احب اساس معين غيري تذمة و هي نوع بشرتها مثلي ، و هذا ما يعني ان الأساس كويس او سيء لهالتقيم يدخل فيه اشياء كثيرة و عوامل مختلفة منها تقبل بشرتي للفاونديشن, نوع البرايمر, تحسس بشرتي لبعض المواد, التغطية اللي ابيها, قوام الفاونديشن, و حتى نوع الفرشة او طريقة وضعه على البشرة

و لو كان في واحد يناسب الكل ما كان تنافست الشركات على صناعة انواع و اشكال و بتركيبات مختلفة. بنات لا تاخذون على كلام احد مين ما كان الا قبل التجربة على بشرتكم عشان تتأكدون انها تتقبلتها و ما تسبب حبوب او تحسس. اعرفو اساسيات و احتياجات بشرتكم و اعتمدو عليها كدليل يقودكم لأختيار الفاونديشن المناسب لكم

  نوع الفونديشن المناسب لبشرتك

البشرة المعرضة للحبوب: اختاري شي خالي من الزيوت و ما يكون قوامه ثقيل عشان ما يسد المسام و يكون حبوب زيادة, لا تستعملين يدك لما تحطينه و احرصي على نظافة فرشك عشان ما يسير فيها بكتريا و تطلع لك حبوب 

البشرة الجافة: اختاري فاونديشنات كريمية و مرطبة, حاولي ان قوامها يكون خفيف و مائي عشان ما تمسك بالمناطق الجافة و تبان بشرتك طبيعية

البشرة الدهنية او المختلطة: احرصي ان يكون الفاونديشن بدون زيوت و يفضل ان تغطيتية طبيعية او مات وتأكدي انك  تستعملين برايمر للتحكم بالدهون و مظهر المسام

نصيحة: لا تاخذين فاونديشن على كلام صديقتك او البائعة لان كل بشرة تختلف عن الثانية و اللي يمشي على غيرك ممكن 

 ما يمشي عليك ابحثي عن الفاونديشن على حسب نوع بشرتك و اقري عن الاشياء المعروفة و اللي تناسب نوع بشرتك و جربية هذا اهم شي

اختيار لون الفاونديشن بالسوق

- خذي تيستر و لا تعتمدين على اللون بالعلبة بس و امسكيه بيدك شوفي قوامه و كثافته, اذا ما عطوك تستر جيبي علبة عدسات او علب صغيرة يبيعونها بوايتس و الدانوب و حتى سيفورا او يوفرونها و ابدا لا تستحون بنات هذا من حقكم انتو بتدفعون بالشي فجربو بالطريقة اللي تريحكم خصوصا الفاونديشن هذا اهم جزء بالمكياج 

- عشان تختارين اقرب لون لك جربي الفاونديشن بدون ما تكونين حاطة شي على وجهك و جربي اكثر من درجة عند عظمة الفك بالمنطقة اللي بين الخد و القبه (مثل الصورة) و شوفي اكثر لون يندمج مع بشرتك عشان ما يبان انك حاطة قناع. خذي احد معاك يساعدك بالحكم او استشيري لموظفة لو حسيتيها فاهمة

- لا تثقين بأضاءة المحل, احيانا نشتري اساس حلو لونه بالسوق بس بالبيت تكون الدرجة مختلفة تماما هذا لان اضاءة لمحل تلعب دور فحاولي تختارين الدجة باضاءة طبيعية. انا اطلع برى المحل و اشوف الدرجة بالنور العادي و خلي الفاونديشن يقعد على بشك لان في بعض الماركات الفاونديشن يتأكسد فتغمق دجته و بكذا ما تجيبين اللون الصح

- لا تحاولين تغمقين او تقتحين نفسك و تلعبين بالالوان, بتبانين باهتة و رمادية او كأن وجهك وصخ, العبي بس بالبرونزر و البلش عشان يبان الشكل طبيعي  

مشاكل الفاونديشن

كلنا يسير لنا مشاكل مع الفاونديشن نشتري بالسوق او اونلاين و ما يناسبنا لما نجربة بالبيت

 بما ان ما عندنا سياسة ترجيع هنا و اغلب الاحيان نتورط بالفاونديشن و نتركة عندنا بدون استعمال حبيت اشارككم بنصايح بسيطة تخليكم تستعملون الفاونديشن و تخلونه يناسبكم

تعديل الدرجة:

نفرض انك شريتي اساس و كان غامق او فاتح عليك بس الاندرتون صح ايش تسوين؟

- اذا كان افتح منك بكم درجة ممكن تستعملينه كأضاءة لتحت العين و الجبهة و الذقن زي الكونسيلر الفاتح

- اذ كان اغمق منك بكم درجة ممكن تستعملينه بالصيف لما تسوين تان او تخلطينة مع اساس ثاني او تستعملينه ككونتور خفيف كريمي عشان تحددين ملامحك بشكل طبيعي.

- هذي اسهل طريقة للبنات اللي يتغير لونهم كثير بسبب التان او صعب عليهم اختيار دجةالفاونديشن, بودي شوب نزلو هالمنتجين لتعديل الوان الاساس (تفتيح او تغميق) ما لهم اي تأثير على قوام الفاونديشن. متوفرين عندنا ممكن تجيبونهم و بيحلون ازمة الدرجات 

في درجتين وحدة تغمق و الثانية تفتح

تعديل الاندرتون:

خلونا نفرض انك شريتي فاونديشن بس الاندرتون ما ناسبك ايش تسوين؟

- الاندرتون وردي بس انتي اندرتونك اصفر: بس جيبي برايمر او كوركتر (مصحح) اصفر و حطيه على بشرتك قبل الفاونديشن او اخلطي الكمية اللي بتستعملينها على سطح نظيف او يدك, المصحح بيعادل اللون الوردي و الاندرتون بيسير مناسبك

- الاندرتون اصفر بس انتي تبينه وردي: نفس الفكرة بمصحح وردي او ليلكي اخلطيه بالفاونديشن و بيتعدل الاندرتون.

- اشياء ثانية مممكن تسوينها اذا الاندرتون ما ناسك , لو كان على وردي اخلطي معاه بلش كريمي او بودرة او حتى شدو كسريه و اخلطية مع الفاونديشن و بيسير عندك بلشر كريمي خفييف و طبيعي.

- لو كان الفاونديشن على صفار ممكن تخلطين معاة لمعه منثورة او شدو لمعه ما تستعملينه و يسير عندك اضاءة سائله للوجه و الجسم. 

و كذا نكون خلصنى من هالتدوينة ان شاءالله انها تكون شاملة و المعلومات افادتكم و حبيتوها, لا تنسون تسون فولو للمدونة عشان يصولكم الجديد (الزر فوق بالجهة اليسار) و شاركوني ارائكم  بالكومنتات و ارسلوها للبنات اللي بيفيدهم هالموضوع

سلسلة الاساسيات: skin prep تجهيز البشرة للمكياج

بسم الله هذي اول تدوينة لي و متحمسة لها مرة

اهلين بنات ان شاء الله كلكم بخير 

 كلنا نعرف اهمية تجهيز البشرة من ناحية النظافة و الترطيب مرة بيفرق معاكم الشكل النهائي للمكياج, بهالبوست بشارككم طريقتي (انا بشرتي نوعها مختلطة) لا تهملون تهيئة بشرتكم  للصباح ممكن تختصرون الخطوات بغسول و ترطيب و للمساء او المناسبات تزودون خطوات على حسب وقتكم

نقطة مهمة: اي منتج علاجي من تفتيح بقع او تقشير لا تحطونة الصباح او قبل المكياج عشان ما يتأثر بمواد ثانية او من اشعة الشمس فيعطي نتيجة عكسية و يضر بدال ما ينفع اتركوه للعناية الليلية

اول خطوة: تنظيف البشرة

هالنقطة جدا مهمة عشان تتخلصين من الشوائب اللي على بشرتك و يكون سطح نظيف يستقبل اي شي يجي عليه

انا استعمل فوريو لونا ميني موجودة بوايتس من الناحية الخلفية لانها اقوى شوي فتسوي لي تقشير بسيط مع غسول غارنيه جبته من التميمي ينظف وجهي كويس بدون ما ينشفة و كاتبه عنهم بأنستغرام  او استعملي اي مقشر او غسول  تحبينة المهم ان بشرتك تكون نظيفة 

زي ما تشوفون هالناحية حبيبات السيلكون فيها اكبر فيكون تنظيفها اقوى كأنها مقشر 

الخطوة الثانية: تقشير و ترطيب الشفايف

 ما اتوقع في وحدة منا تحب شكل الشفايف الناشفة او المشققة عشان كذا احرصي انك تقشرينهم كويس و تستعملين مرطب قوي قبل اي شي تسوينه و خليه على شفايفك طول مدة التجهيز الين توصلين لوقت الروج لو كان لسه في زايد على شفايفك ما امتصته ممكن تشيلينه بشويش بمناديل و تبدين بروجك او التحديد

انا احب مقشر لش افضل مقشر استعملته رقيق على الشفايف و يشيل كل الجلد الناشف بدون ما يأذي شفايفي او ينشفها زيادة, المرطب ما استعمل الا حبيبي كارمكس لو شفايفكم تعبانه خذوه بدون تردد يرطب و يعالج الشفايف و يدوم لوقت طويل و ما فيه كحول او عطريات زي المرطبات الثانيه اللي تخلي شفايفك ناشفة و تظلين تستعملينهم بدون تحسن  بسبب الكحول المضاف ولا يسود الشفايف, انا اجيبة من التميمي    

الخطوة الثالثة: ترطيب و عناية

مهما كان نوع بشرتك لازم ترطبينها قبل المكياج و لكل بشرة في كريمات تناسبها , عدم ترطيب البشرة يكون احيانا سبب من اسباب عدم ثبات  الاساس  لان لما تحطين على بشرتك شي سائل و هي عطشانة بتمتصة كمرطب عشان كذا لا تنسين تستعملين كريم ترطيب.

  البنات اللي بشراتهم دهنية او مختلطة جيبو الكريمات اللي تكون خفيفة, خاله من الزيوت و قومها اقرب للجل عشان ما تدهنكم زياده او تقعد كطبقة فوق بشرتك انا استعمل واحد من بوتس  قوامه جل و مكون من مواد طبيعية تمتصة البشرة بسرعة و ما يخليني ادهن خلال اليوم هو من نفس ماركتهم اسمه 

  سعرة 40 ريال botanics - mattfying gel cream  

ترطيب منطقة تحت العين ضروووري لان هالمنطقة رقيقة و ما تنتج زيوت فما لها اي ترطيب ذاتي وكريم العين بيساعدكم بمشكلة تخطيط و جفاف الكونسيلر فلا تهملونه, انا ستعمل كريم كيلز بالافوكادو هو للترطيب بس ما له اي فوائد علاجية للهالات و غيرة

احب كمان ارش اي سبراي للبشرة سواء فكس بلس او موية ورد خصوصا قبل الكريم او لو بتستعملون سيروم يعتبر خطوة ترطيب اضافية و يساعد بامتصاص الكريم او السيروم من بعده 

سيروم الاضاءة من شركة كوميدونس تلقونها بصيدلية وايتس احسه نسخة اخف من ماك ستروب كريم فيه لمعة ذهبية خفيفة مره حلو قبل المكياج ينور الوجه و يبين البشرة صحية 

الخطوة الرابعة: الماسكات السريعة

هالخطوة مو اساسية بس حلوة لو عندك مناسبة او شي معين و محتاجة بشرتك تكون بأحسن حال

هالنوع من الماسكات يعطي نتيجة فورية فخذي شي لاحتياجك سواء ترطيب او انتعاش و حطيهم بعد ما تغسلين وجهك و 

بعدين  كملي خطوات العناية عادي و الزايد مدية على بشرتك و الرقبة بمساج خفيف, بيعطونك نتيجة سريعة تأدي الغرض 

المدة

بعد 10 دقايق تقدرين تبدين مكياجك عادي عشان تكونين متأكدة ن بشرتك امتصت كل شي

بكذا نكون انتهينا ان شاءالله انكم استفدتو و لا تنسون تشاركوني رايكم بهالبوست  و تكتبون لي اقتراحاتكم للتدوينات الجاية بأذن الله