سلسلة الاساسيات: مبادئ المصحح بشكل مبسط color correcting 101

اهلين بنات ان شاءالله كلكم بخير

موضوعنا اليوم عن المصححات, ادري ان هالشي يلخبط و البعض وسعة بشكل مبالغ شوي و غير واضح ,فاليوم بنرجع لاساسيات و بعلمكم كل لون لايش يستخدم و ايش الدرجة المناسبة لكل بشرة و مشاكلها

خلونا نبداء من الاساس و هو عجلة الالون عشان يسهل عليكم كل شي و بيسير مرجعنى الاساسي خلال هالتدوينة

اغلبكم يعرف عجلة الالوان و قاعدتها اللي هي: الالوان المقابلة لبعض تنكسل بعضها يعني مثلا الدرجات الزرقة او الخضراء يكنسلها البرتقالي و الاحمر لانه عكسها,  فابحثي عن الدرجات اللي حابة تكنسلينها ببشرتك و ايش مقابلها بهالطريقة بتسهلين على نفسك كثير بدون فلسفة احد

الحين خلينا نشوف كل لون لايش يصلح و ايش درجاته

:الوان المصححات و استخداماتها

:المصحح البرتقالي -

مثل ما قلت لكم من قبل البرتقالي يكنسل الدرجات الزرقة و الخضراء زي ما هو باين بعجلة الالوان و هذي هي الوان الهالت و المناطق الغامقة بشكل عام مثل حول الفم و اثار الحبوب بالغالب تكون مايلة للازرق او الاخضر و فيه منه عدة درجات لكل بشرة

ليش من كل لون في اكثر من درجة؟ مثل ما ان ما في فاونديشن يناسب كل بنت بالعالم نفس الشي للمصححات ما يسير بنت درجة بشرتها بيضة تحط مصحح برتقالي غامق و تتتوقع انه ما راح يترك اثر بعد الدمج مع الكونسيلر او بنت بشرتها حنطية تحط مصحح لونه مشمشي فاتح و تتوقع انه بيخفي هالتها و هو افتح من بشرتها

شيئين ضروي تحطينهم ببالك قبل ما تشترين المصحح: لون بشرتك و درجة الهالات او المناطق الغامقة عشان تنجحين باخفاء اللي ما تبين و ابراز اللي تبين

البشرات الفاتحة: و اللي هالاتها متوسطة تجيب مصحح مايل للون المشمشي مو برتقالي عشان تقدر تخفي هالاتها بشكل صحيح و اذا كانت هالاتك غامقة جيبي مشمشي غامق شوي عشان تكنسلين الهالات

البشرات الحنطية: ممكن تجيبون البرتقالي بمختلف درجاتة, لا تجيبين شي افتح من درجتك بيسير باهت و رمادي و كأنك ما سويتي شي 

البشرات السمراء: جيبو البرتقالي الغامق او المايل للحمار لانه بيعطي شويه دفئ و يكنسل الهالات بشكل كلي

ماركات كويسة: ماك, ميك اب فورايفر, ال اي غيرل, بوبي براون,نكس

:المصحح الاخضر -

ارجعو لعجلة الالوان  بتشوفون ان لاخضر يقابلة الاحمر فبنحط المصحح الاخضر على اي مكان فيه احمرار مثل الحبوب اللي توها طالعة او جوانب الانف او على الخدود حسب بشرتك و لونها و نوعها باختصار اي احمرار عندك تبين تخفينه حطي عليه المصحح الاخضر

حطي كمية قليلة بس على المنطقة اللي تحتاينها, ادمجيه و بعدين كملي مكياجك عادي

الماركات الكويسة هي: سماش بوكس, ميك اب فورايفر, ال اي غيرل, نكس

:المصحح الاصفر -

 الاصفر يستعمل عشان يعطي البشرة اشراقة و حيوية لانه مقابل البنفسجي على العجلة

و لو كانت بشرتك فاتحة و هالاتك مايلة للبنفسجي استعملية كمصحح مو لازم مشمشي لان البنفسجي يكنسله الاصفر بعلة الالوان, ممكن تحطينه بالاماكن اللي تبين تبرزينها مثل تحت العين و الجبهة و الذقن انا مرة احب احطة تحت عيني مع الكونسيلر

زي ما انتو شايفين عندها درجات بنفسجي تحت عينها فحطت الاصفر اللي يناسب بشرتها لونه فاتح و بعد الدمج عطاها اشراقة و كنسل اللون البنفسجي

كمان ممكن تستعملينه لو عندك المنطقة تحت العين داخلة شوي و في خط عندها تحطين المصحح الاصفر بس على هالمنطقة عشان تبرزينها و ما تبان داخلة 

 الاصفر في منه درجات مثل غيرة من المصححات فخذي الدرجة اللي تتناسق مع لون بشرتك لا تجيبين شي فاتح مرة و انتي سمراء بيطلع رمادي و يبهتك او شي غامق مايل للدافي و انتي بيضة عشان ما تبانين مريضة و بشرتك صفراء

شوفو كيف درجة الصفار هذي متناسقة مع لون بشرتها

ماركات كويسة: ماك, ميك اب فورايفر, ال اي غيرل,نكس

:المصحح البنفسجي -

مهو منتشر كثير هاللون من المصححات عندنا بس ارجعو شوفوه بعجلة الالوان تلقون مقابلة الاصفر فهو بيكنسل لكم صفار البشرة يعني لو كانت بشرتك تعبانة و مصفرة او ما فيها حيوية و باهته/شاحبة ممكن تحطين المصحح البنفسي على مناطق الصفار او المناطق المرتفعة مثل عظمة الخد عشان تبرزينها و تدمجينة بشكل خفيف بينور وجهك و يبينه صحي بشكل طبيعي مرة

ماركات كويسة: سماش بوكس, ميك اب فورايفر ,نكس

شوفو هالصورة شاملة لاكثر من لون و تقدرون تشوفون الشكل النهائي للبشرة كيف صار, هي استعملت الاخضر على الخدود و حول الفم و الاصفر تحت العين لان هالاتها مايلة للبنفسجي زي ما هو باين بالصورة الاولى و اخر شي البنفسجي على الاماكن اللي تبي تبرزها بشكل طبيعي و هي الحاجب و عظمة لخد. و بعد الدمج بشرتها مبينه صحية و مشرقة بشكل طبيعي

طريقة استعمال المصحح

ابدا ما انتو بحاجة كميات كبيرة من المنتج او انكم توزعونة على مساحة كبيرة, بنات حطوه بس على المنطقة اللي تبون تصححونها بكمية قليلة و ادمجوة بمكانة بتلاحظون ان الهالات او الاسمرار اختفى و بشرتك لونها طبيعي كذا يعني انتي استعملتيه صح لو مديتية بزيادة و كثرتي الكمية بشرتك بيسير لونها مث لون المصحح اللي استعملتيه لانها مو بحاجة تصحيح فبتروح قوة اللون المصحح و بسيربس لون على بشرتك ما له هدف و بيأثر على لون ااساس او الكونسيلر لما تحطينه فوقة

هالتكنيك نفسة استعمليه على اي منطقة بتحطين عليها مصحح, الذكاء مو بالكثرة الذكاء هو انه يبان بشكل طبيعي و يحقق المنتج الهدف اللي استعملتيعه عشانه, فلما تنتهين من مكياجك تبان بشرتك بلون واحد

متى احط المصحح؟

في ناس تحطة بعد الاساس و ناس قبلة بالنسبة لي انا افضل انه يكون خطوتي الثانية بعد البرايمر احط المصحح على المناطق اللي تحتاجة و ادمجه بمكانه باسفنجة مبلولة بعدين احط الفاونديشن او الكونسيلر بطريقتي المعتادة بكذا اقدر اشوف نتيته بشكل فوري و اقدر امسح لو كثرت بدون ما اخرب الاساس 

هل استعمل المصحح بشكل يومي؟

هالسؤال ما يجاوبة الا انتي اذا كانت عيوب بشرتك واضحة و ما يغطيها الفاونديشن او تبان بعد كم ساعة و هالشي يضايقك فاستعمالك للمصحح بيقلل من هالمشكلةم مو شرط نوع ثقيل في انواع خفيفة و تناسب لكل يوم و ماشاءالله الماركات لسة مستمرة بانتاج كميات و انواع مختلفة من المصححات فكل وحدة منا بتلقى شي لها

كل بنت تحتاج مصحح؟

كمان انتي الحكم بهالقرار هل عندك هالات قوية ما يغطيها الكونسيلر؟ او عيوب ما يخفيها الفاونديشن؟ احمرار بشرتك يبان بعد كم ساعة من مكياجك؟ راقبي بشرتك  و شوفي ايش تحتاجين مو شرط كل بنت يكون عندها باليت كوريكترات مختلفة الا اذا كانت محتاجتها, حاليا صار في برايمرات قوامها جدا خفيف مناسبة للي عندهم تصبغات خفيفة و تتوفرعند ميك اب فورايفر او سماش بوكس

و اغلب الماركت يدخلون المصححات في الكونسيلر او الفاونديشن فتغني البنات اللي

  يعانون من تصبغات بسيطة بشكل كبير من خطوة المصحح يعني ابد مهو شي اساسي للكل

اتمنى اني افدتكم بهالتدوينة و بسطت لكم بحر المصححات و استخداماتها, لا تنسون تكتبون لي ارائكم و اقتراحاتكم بالكومنت و اشوفكم بالتدوينة الجاية 

brand spotlight : Kat Von D

اهلين بنات ان شاءالله تكونون بخير

 بما ان سيفورا  بيطلقون اكثر من ماركة و منها كات فون دي حبيت انقل لكم تجربتي عن بعض منتجاتهم اللي جربتها عشان تاخذون فكرة 

بتنزل رسميا  بنص شهر مارس في فرع سيفورا المملكة بالرياض و شارع التحلية بجدة  وفرع الظهران مول  بالشرقية وبشهر ابريل راح تنزل بباقي الفروع كاملة

المنتجات اللي جربتها من عندهم هي الارواج السائلة, باليت الكونتور, باليت الشدوهات و الايلاينر. راح اشارككم تجربتي فيهم و هم تقريبا من اشهر منتجاتها 

اكثر شيئين احبهم بهالماركة انهم ما يختبرون على الحيوانات و ثاني شي ان كات نفسها ما تنزل شي للسوق الا و هي مجرتة و متأكدة من جودتة و ما تستعمل الا اغراضها فتكونين متأكدة ان كل شي جودتة عالية


:خلونا نبداء بالارواج السائلة

اعتبرهم من افضل الارواج السائلة من المجموعة الكبيرة اللي نزلت، الفورميلا حقتهم مرة خفيفة و كريمية ما كأني حاطة شي على شفايفي و منظرهم مخملي و ما يقعدون بين الخطوط او يطلعون شكل الشفايف مو حلو، ثباتهم عالي يظلون وقت طويل علي حتى بعد ما اكل او اشرب

هذي درجة لوليتا المشهورة

الفرشة حجمها حلو و مناسب للتوزيع و الكمية اللي تطلع معاها مناسبة جدا لانك تمدين
 اللون بكل راحة, و هاللون لوليتا حلو مررة يناسب الكل صدق الكل ايش ا كان لون بشرتك بيمشي عليك و حلو لاي وقت و على اي لوك

بيكون سعر الاواج السائلة 100 ريال

نجي لبالبت الايشدو 
الالوانها ترابية و تجي بشكل كانها مقسمة لثلاث باليتات زي ما انتو شايفين الالوان هذي اساية لكل بنت سواء مبتدئة او مترسة للمكياج لانك تقدرين تستعلملينها بشكل يومي لمكياج بسيط او مكياج ثقيل

الايشدو كله مات و قوامهم مخملي الالوان قوية جدا و واضحة من اول مسحة بدون برايمر و كل الالوان بنفس الجودة مثل الزبدة
 تتناثر شوي و هالشي طبيعي لاي لون قوي لان كل ما كانت جزيئات البودرة  ناعمة تزيد نسبة قوة اللون, يندمجون بسهولة و بعض الالوان تنفع للحاجب و مع انهم مات ابدا ما يبانون ناشفين على العين او مثل الطباشير

شوفو قوة الالوان و نعومتها بالسواتش, ما في اختلاف بجودتهم زي ما قلت لاحظو اللون الابيض كيف قوي و ناعم و الاسود نفس الشي, يندمجون بكل سهولة و ابدا ما يتعبون لما تبنين الالوان فوق بعض, الصراحة من افضل الشدوهات اللي استعملتها ببحياتي و اكيد ارجع اشتريها

بيكون سعرها 220 ريال

باليت الكونتور
بأختصار ما في اختلاف بمستوى الجودة, انا جربت كثير باليتات كونتور لكن من جبت هذي ما استعمل غيرها, البودرة ناعمة بشكل مو طبيعي انعم من الشدوات و تندمج لدرجة انها تسير جزء من بشرتك ما تقعد فوقها كطبقة مزعجة

اللون الاصفر اخلطة مع البرتقالي عشان انور تحت عيني و اكنسل الهالات بوقت وحد, تعطيني نتيجة فورية و ما تقعد بالخطوط ولا تنشف منطقة تحت العين 
و ممكن احط البرتقالي بس على اماكن اسمرار حول الفم بدال المصحح

للكونتور ابدى بالدرجات الدافية على اماكن الكونتور بفرشة كبيرة بعدين استعمل اللون الجاي على رمادي للكونتور فأطلع بنتيجة طبيعية و كونتور ناعم مهو واضح بشكل حاد

سعرها بيكون 220 ريال


الايلاينر السائل
بدون مبالغة بنات كل وحدة منكم لازم تشترية لو على الاقل مرو وحدة

يعتبر واحد من منتجاتها الافضل مبيعا و بما ان كات تاتو ارتست فالدقة شي مهم عندها هذا القلم دقييييق لابعد الدرجة بالرسم يطلع لك كمية كحل مناسبة للرسم و جدا سهل و سلس الرسم فيه بسبب راس فشتة تقدرين تكونين فيه لاينر خفيف او ثقيل و تضبطين بداية الايلاينر و تحددين اخرة , سوادة فاحم و قوي , ثابت طول اليوم و ضد الموية, شكلة ما يتغير خلال اليوم لا ينشف ولا يسيح ولا يتقشر

من الاشياء اللي حبيتها فيه هو ان الغطى حقه محكم ما يدخل اي هواء عليه فتظل الفرشة رطبة و يدوم لوقت طويييل

سعرة بيكون 100 يال

و بكذا اكون خلصت معاكم الريفيو السريع عن بعض منتجات كات فون دي اللي بتنزل عندنا و تكونون اخذتو فكرة عن الاسعار و جودة المنتجات



اشوفكم بتدوينة جديدة و لا تبخلون علي بتعليقاتكم اللي تسعدني 

تعقيم المكياج و الفرش

اهلين بنات ان شاءالله كلكم بخير

الاسبوع اللي فات نزلت على سناب شات طريقتي بتعقيم فرشي و المكياج و جتني كثير اسئلة و مخاوف من هالشي و الكثير ما كان يعرف ان مفروض نعقم مكياجنا و الادوات اللي نستعملها فقلت انزل الموضوع هنا عشان اجاوب عن اسألتكم و يسير مرجع لكم

سنابي: raghad_beauty

ليش نعقم المكياج و الفرش؟

المكياج جزء من يوم اغلب البنات و دايما نستعملة و لو كنا ببيت واحد اكيد يستعمل احد معاك اغراضك سواء امك, اختك, قريباتك, و ممكن حتى صديقاتك . فنادرا ما يكون الغرض استعمال شخصي و مع ان مشاركة المكياج ما ينصح فيها لتناقل البكتيريا لكننا لسة ما نلتزم بهالنصيحة فما بالكم بكمية البكتريا الي عايشة على منتجاتكم الحين

لما فرشنا تكون مو نظيفة و فوق كذا مكشوفة تلم غبار و وصخ , نجي احنى نستعمل هالفرش على منتجات مختلفة من علب شدو و بودرات و نحطها على وجهنا و ممكن يكون عندك حبوب او بشرتك مو نظيفة و يجي غيرنا يستعمل منتاجتانا بفرشة الخاصة او باليد على بشره ممكن تعاني من مشاكل هذا كله يسير مسبح جراثيم و ممكن يضر البشرة حتى لو كنتي تعتنين فيها بشكل كويس متخيلين كيف سهل جدا اننا ننقل جراثيم بدون ما نحس 

فتعقيم ادواتك و المكياج الخاص فيك ضروووري جدا

    

هذا شكل روج و شدو قبل و بعد التعقيم

طريقة التعقيم 

الطريقة سهلة و ما تاخذ منكم وقت كل اللي تحتاجونة هو محلول كحول خالص ما بين 70% و %90 وتلقون الكحول بأغلب الصيدليات الكبيرة 

نسبة 70% هي ادنى نسبة قادرة على قتل الجراثيم فلو ما لقيتي %99 عادي مهو ضروري مكياجك بيتعقم, شي مهم جدا  انكم ما تخففون الكحول بموية او تخلطون معه اي شي ثاني لانه بيأثر على مكياجكم و ممكن يخربة لازم يكون كحول بس

انا حطيته بعلبة بخاخ وجه  (لو بتسوين مثلي اكتبي على العلبة ان فيها كحول عشان ما تتلخبطين و تستعملينها على وجهك او يستعملها احد غيرك .. الا لو حابة 
(تنتقمين من شخص معين ههههههههههه امزح معاكم طبعا

ممكن تستعملين اي علبة بخاخ فاضي عندك او تشترين لك بخاخ من دايسو, بوتس, سيفورا, او الدانوب عشان تسهل عيك عملية التعقيم

عرفنا من وين نجيب كحول و كيف نستعملة نجي للتعقيم

تعقيم لمكياج

 البودرة: سواء بلش,هايلايات,شدوهات, اي شي بودرة افتحي العلبة و بخي عليهم من بعيد تأكدي ان كل الاجزاء تغطت بالكحول بدون ما تغرقين المنتج يعني يكفي رشتين او ثلاثة و مسحي احاوف العلب بقطنة فيها كحول و اتركيها مفتوحة الين تنشف و ما ياخذ وقت من 3 الى 5 دقايق بس

المنتجات الكريمية: مثل باليتات الكونسيلر و الكونتور الكريمي, هايلاي كريمي او بلش عندط خيارين يا انك تسوين نفس حركة البودرة او ترشين الكحول على قطنة و تمسحين سطح المنتج و تنتظرينه ينشف

الفاونديشن: كل اللي عليك تسوينه هو بقطنة فيها كحول تمسحين الغطى من الداخل و الفتحة اللي يطلع منها الفاونديشن

الارواج: بقطنة فيها كحول طلعي كمية من الروج و امسحي و انتظري ينشف

ما ينصح بهالحركة للتعقيم للغلوسات و المسكارة فلو سمحتو احرصو ان محد يستعملها معاكم

الفرش

طبعا يفضل انكم تنظفونهم بعد كل استعمال  خصوصا فرش الفاونديشن و اذا كانت بشرتك دهنية او معرضة للحبوب,  في منظف الفرش الفوري عند سيفورا و ايلف لكن ممكن خلال الاسبوع ترشون الكحول على الفرشة و تمسحونها بمنديل الين تنظف 

التعقيم وقت الغسيل له طريقتين الاولى انكم تجيبون شوية من الكحول بكاس و تغمرون الفرشة فيه و بعدين تغسلونها و تكبون الكمية اللي توصخت و تحطون كمية جديدة, انا ما احب هالطريقة لانها تاخذ وقت و احس اني قاعدة ارمي كمية كبيرة من الكحول

الطريقة الثانية و هي الانسب و الاسرع بالنسبة لي,  بعد ما اغسلهم ارش عليهم من 
الكحول الين ينشفون و بكذا اتأكد انهم نظاف و معقمين (فرش الفاونديشن يفضل تغسلينهم بعد كل استعمالين الى ثلاثة ) و باقي الفرش من اسبوع لاسبوعين حسب كثرة الاستخدام

هل له تأثيرعلى مكياجي؟

ابدا ما في اي تأثير على جودة المنتجات ما يقلل منها ولا يغيرها  بهالصورة هذي سواتشات لانواع مختلفة من المنتجات المعقمة شدوهات مات ,بودرة كونتور ,اضاءة تلمع, و بلشر كريمي 

الشدوهات لمعة و مات بعد التعقيم

البلشر و الاضاءة و بودرة الكونتو

المنتجات الكريميه بعد التعقيم

زي ما انتو شايفين الالوان واضحة و بدون اي تعديل او برايمر وضوح اللوان مثل ما كان من قبل
متى لازم اعقم؟

اذا كان استعمالك شخصي و تستعملين مكياجك بشكل شبه اسبوعي عقمي اغراضك كل اسبوع, و اذا كان احد ثاني يستعمل معك عقمي الاغراض اللي يستعملونها بعد ما يخلصون من الاستخدام يعني لو اختك اخذت منك علبة شدو لما ترجعها عقميها على طول و للميك اب ارتست اكيد التعقيم يكون بعد كل زبونة استعدادا للزبونة الجاية زي ما شفتو الطريقة ما تاخذ وقت ابدا ولا تأثر على جودة المنتجات باي طريقة


و خلصت تدوينة اليوم ان شاءالله انها كانت مفيدة و تعقمون اغراضكم من بعد ما قريتو هالكلام زي ما انتو شايفين الطريقة مرة سهلة و ما تاخذ وقت لا تنسون تشاركون البوست مع اي احد حابين انه يستفيد او وروهم صور البكتريا عشان محد يستعمل اغراضكم ههههههه