سلسلة الاساسيات: الكونسيلر

اهلين بنات انشاءالله كلكم بخير

موضوع اليوم بيكون عن كل شي يخص الكونسيلرات 

الانواع

قبل ما تشترين الكونسيلر لازم تعرفين النوع اللي تحتاجينه و ايش الوظيفة اللي تبينها منه

الكونسيلر يجي منه نوعين: كريمي و سائل

سويت لكم هالصورة عشان تختصر و تسهل لكم الفكرة. لما تجين تشترين الكونسيلر اعرفي ايش احتياجك عشان ما يخيب ظنك بالنتيجة  و تاخذين اللي يناسبك بشكل اسهل مع اختلاف القوام و التركيبة طبعا

اختيار اللون

الكونسيلر لتحت العين

هالفقرة تلخبط كثير بنات لكن الموضوع سهل مرة, اللون الصح اللي تجيبينه هو لونك انتي ( احنى الحين نتكلم عن لون الكونسيلر الطبيعي مو اخفاء تصبغات او اضائة تحت العين) لا تحاولين تفتحين اللون بدون تعديل للهالات لانك بتقلبين رماديه, عشات نسهل السالفة خذي اللون اللي قريب للون الفانديشن حقك شوفي الطرقة هنا

اذا تبين تكنسلين هالاتك بدون تعب المصحح خذي لون اغمق منك بدرجة كذا تكنسلين الهالات و ما يقلب رمادي لكن لما تجين تحطينه تعاملين الكونسيلر زي ما تعاملين المصحح حطية بس على مكان الهالات  ادمجية  بعد كذا حطي اي كونسيلر او اضائة مايلة للصفار عشان تنورين المكان (هالطريقة بس تنفع للبنات اللي هالاتهم بسيطة و لما ياخذون كونسيلر نفس لونهم يحسونه باهت) اذا هالاتك جدا قويه هالطريقة ما راح تفيدك ضروري مصحح, موضع المصححات 

اذا كنتي من البنات اللي ما يعانون من الهالات و تحبين المظهر المنور تحت عينك خذي كونسيلر افتح منك بدرجة او ثنتين كحد اقصى عشان يعطيك النتيجة اللي تبينها



الكونسلر للوجه

اذا بتجيبن الكونسيلر عشان تخفين اثار بقع او تصبغات او حبوب طبعا ضروري يكون يا مثل لونك او انا افضل اغمق بدرجة عشان يكنسل اي اسمرار و الطريقة جدا بسيطة قبل ما تحطين الفانديشن حطي الكونسيلر على المناطق اللي فيها مشكلة و ادمجية بمكانه بشكل خفيف بعد كذا حطي الفاونديشن و بتحصلين على بشرة صافية

طريقتي بوضع الكونسيلر و تقليل مظهر الخطوط

خلينا نكون واقعين جميلاتي اذا انتي بالطبيعة عندك خطوط تحت عينك ما في منتج تجميلي بيخليها تختفي  بالعكس ممكن تبرزينها بشكل اكبر

للكونسيلر خلو هالنصيحة ببالكم: كل ما قللتي كمية المنتجات تحت العين كل ما قل

 تجمع هالمنتجات بالخطوط و ابرازها و كل ما قل جفاف المنطقة

اول خطوة هي الترطيب, طبعا مهم انك ترطبين منطقة تحت العين قبل ما تحطين كونسيلرعليها لان زي ما احنى عارفين الجلد بهالمنطقة جدا رقيق فاحرصي على الترطيب قبل بعشر دقايق عشان تتاكدين ان بشرتك امتصته  المنطقة جاهزة للشغل

 انا بعد الترطيب استعمل برايمر لتحت العين من ماركة "غوش" يعطيني نتيجة حلوة و يقلل من مظهر الخطوط كتبت عنه ريفيو هنا

اذا بتحطين مصحح هذا وقته, حطي كمية قليلة على مكان الهالات بس و ادمجيه بالبيوتي بلندر (يفضل ان كل شغلك يكون بالبيوتي بلندر مو الفرشة لاننا ما نبي نحرك المنطقة كثير عشان ما تدخل المنتجات بالخطوط)  بعدين حطي الكونسيلر عادي بالطريقة اللي بالصورة

 ابدا لا تحطينه تحت عينك بالضبط او تحطين كمية كبيرة لانها بتقعد بالخطوط و بيكتل معاك و ادمجيه بالبيوتي بلندر و اذا كنتي تبدين بالفاونديشن قبل ابدا لا تقربينه من منطقة الكونسيلر لانه بيكتل عليك و ما منه فايدة تحت العين 

بعد الدمج طالعي فوق و طبطبي بالبيوتي بلندر عشان تتاكدين انه مدموج كويس و على طول ثبتيه ببودرة انا افضل اللوس على البودرة العاديه لانها اخف و مظهرها انعم لتحت العين (اذا عندك خطوط تحت العين لا تسوين تكنينك البيكنغ ولا تحطين كمية بودرة كبيرة لانها تسحب الرطوبة من البشرة فيبان تحت عينك جاف بسرعة) ما تحتاجين الا شوي بس , افضل لوس باودر لتحت العين عندي هي لورا مرسيرو غوش

و هذا هو موضوع الكونسيلر ان شاءالله انه كان بسيط عليكم 

سلسة الأساسيات: دليل البرايمر primer guide

اهلين بنات ان شاءالله كلكم تكونون بخير

بما ان تجيني اسألة كثييير عن البرايمرات و انواعها حبيت اكتب لكم كل شي هنا عشان يكون مرجع للكل و ان شاءالله اسهل الفكرة و اوضحها لكم

ايش هو البرايمر؟

البرايمر هو مهيء للبشرة و يساعد بتثبيت المكياج و تنعيم سطح البشرة وتغطية بعض المشاكل عشان تطلعين بمنظر نهائي جميل

تقدرين تستعملينه حتى بدون مكياج عشان تحسنين من مظهر البشرة,  طبعا هو حل تجميلي مؤقت مهو علاجي بشكل عام لكن البعض يكون مدعم بالفيتامينات لكن مو بكمية كبيرة

انواع البرايمر

طبعا في كثير انواع فخلينا نبدى على طول 

برايمرات العين

برايمر الايشدو: هالنوع المخصص للشدو عشان يساعد بأبراز اللون و ثباته و ما يخليه يخطط و كمان يتحكم بالدهون لبنات اللي جفنهم دهني و بعضهم كمان يجي فيه لون عشان يكنسل تصبغات الجفن و يبرز لون الشدو نفسه او لون بلمعه ممكن تستعملينه لحاله على طول مع مسكرة او كحل للوك سريع, و بعضها خاص لشدوهات الغليتر المنثورعشان يثبت مكانه مثل توفيسد و ماركة سيفورا

طريقة الاستعمال: حطي كمية جدا قليلة و تأكدي انك تمدينها على كامل الجفن كويس و ثبتيه بلوس باودر او شدو نود, اذا تعانين من تصبغ بالجفن و البرايمر ما غطاه بالطريقة اللي ترضيك حطي كمية قليلة من اي كونسيلر خفيف عندك و ادمجية كويس و ثبتيه بنفس الطريقة و ابدي بشغلك عادي

برايمر تحت العين: هذا النوع جدا جميل للبنات اللي يعانون من جفاف منطقة  تحت العين او الكونسيلر يخطط معاهم او يروح بسرعة و كمان يعطون تحت العين اضائة طبيعية 

برايمرات الوجة

البرايمرات المتحكمة بالدهون (مات): هذا النوع مخصص للبشرات الدهنية, وظيفة هالنواع من اسمه هو التحكم بافرازات الدهون بالبشرة و بالتالي المكياج بيثبت معاك اكثر ينحط بس على التي زون اللي هي الجبهة, الانف, و الذقن. انا افضل الي قوامهم جل مثل حق بينفت و الماسكا لانهم خفاف و ما يكونون طبقة على البشرة

  البريمرات المضيئة (ديوي او الومنيتر): يناسبون كل انواع البشرة هذا النوع بس يعطي بشرتك شكل صحي و منور و يعطيها لمعة حلوة و يكون مدعم بمواد تعكس الضوء من على بشرتك, اذا كنتي تعانين من حبوب او مشاكل بقوام البشرة نفسه فأبتعدي عنهم لان اللمعة مثل ما نعرف تبرز العيوب. مو شرط تشترين ممكن تسوينه بنفسك بالبيت بس اخلطي اي لمعة منثورة عندك او حتى شدو فيه لمعة بس احرصي ان جزيئتها صغيرة و اخلطيها مع الكريم المرطب او الفاونديشن و بتعطيك نفس النتيجة

البرايمات السلكونية: هذا النوع مناسب للبنات اللي يعانون من مسام او خطوط فقط ما راح يفيد احد ثاني لان وظيفته هو فقط تعبئة هالمنطقة عشان يوحد سطح البشرة, هم ينقسمون لنوعين النوع الاول يكون قوامه متماسك و له لون بيج بس ما يعطي تغطية هذا اللي بيعبي لك المسام (كيف تحطينة؟ تاخذين كمية جدا قليلة تطبطبينها فقط على منطقة المسام و تنتظرين 5 دقايق عشان يمسك بالبشرة و بعد كذا تحطين اللفاونديشن عادي) لا تكثرين لانه بيقشر من على بشرتك

 النوع الثاني اللي يجي شفاف و قوامه سائل او اقرب للدهني هذا منعم لسطح البشرة و يعبي الخطوط الصغيرة بس ما يسوي شي للمسام يستخدم بالعادة للبشرات اللي تعاني من مشاكل بقوام البشرة نفسه او البشرات المتقدمة بالعمر, عيبهم الوحيد انهم يقللون من ثبات الفاونديشن لان وظيفتهم هي تنعيم السطح زي ما قلنا فكل شي يزلق من عليهم عشان ما يبرز المشاكل 

البرايمرات المصححة: هالنوع يكون اخف من المصححات العادية و وظيفتة تصحيح عيوب البشرة من اسمرار او بهتان و توحيد لون الفاونديشن بدون ما يكون طبقة ثقيلة على بشرتك, طبعا يناسب جميع انواع البشرة حسب احتياجك, اذا ما عندك خبرة بالالوان انا كاتبة عنهم من قبل هنا بالتفصيل

البريمرات المرطبة: هالنوع غالبا شائع للبشرات الجافة او العادية و هو يقوم مقام كريمات الترطيب لكن الفورميلا مخصصة للاستعمال قبل المكياج لان البشرة تقدر تمتصها بسرعة فما تحتاجين تنتظرين, موجودين عند سماش بوكس و ميك اب فورايفر و مارك جيكوبس نتيجتهم على البشرة جدا جميلة يعطي شكل حيوي لبشرتك

البريمرات البخاخ: هذي كمان من الانواع اللي تناسب الكل و احسها اساسية لكل بنت لانها متعددة لاستعمال في عند سماش بوكس و سكن دنيفيا و ماك تقدرون تحطونهم قبل لتهيئة البشرة و ممكن كمان للشدوهات اللمعة عشان تقوي لونها و بعد المكياج عشان تشيلين مظهر البودرة و خلال اليوم لانتعاش وجهك و اعادة الحيوية للمكياج

اكثر الاسئلة الشائعة

 هل الكل يحتاج برايمر؟

بما انه لهم انواع مختلفة زي ما شرحت فأعتقد ان كل البشرات تحتاج برايمر حسب المناسبة اللي هي رايحة لها و لو هي يهمها ثبات المكياج و شكله النهائي على البشرة, زي ما شفتو له وظايف عديدة فكل وحدة بتلقى لها شي اكيد

هل البرايمر مضر للبشرة؟

لا بنات ابدا ما له اي اضرار على البشرة 99% من البرايمرات بالسوق مصممه انها تجلس فوق سطح البشرة عشان بشرتك ما تمتص الفاونديشن و غيرة من المنتجات و بالتالي يدوم مكياجك بشكل اطول لان كل شي يكون بمستوى سطحي فما منها ضرر ابد و كل الكلام المنتشر شائعات ما لها اي اساس من الصحة و ما في ادلة طبية او مصادر معتمدة تثبت هالشي, طول ما انتي تشترين منتجات امنة و تعتنين ببشرتك بعد المكياج بأذن الله ما في شي بيضرها

برايمر السيلكون يوسع المسامات و يضر البشرة؟

هالموضوع تكلمت عنه بأنستغرام و تعمقت بموضوع السيلكون هنا

المسامات موجودة بكامل جسمك و عند كل البشرات لكنها تبان واضحة عند البشرات الدهنية و المختلطة بسبب افرازات الدهون اذا كانت مليانه دهون و وصخ تبان مرئية للعين و لما تسوين تنظيف عميق للبشرة ما تكون واضحة لانها نظيفة, ما في شي يخلق لك مسامات لانها عندك من الاساس. و السيلكون مصرح طبيا و ينصح فيه للبشرات المعرضة للحبوب لان جزيئاته اكبر من ان البشرة تقدر تمتصها فيقلل من تحسس البشرات او تكوين حبوب جديدة بسبب تفاعل بشراتهم مع الاساس

السيلكون موجود بكثير من المنتجات التجميليه زي البودرات و الفاونديشن عشان يسهل مدهم و دمجهم على البشرة و موجود بكريمات الشعر و الجسم لانه عنصر منعم فيحتاجونه لتخفيف قوام اغلب المنتجات مهو محصور على البرايمر فقط

هذا:  موقع طبيبة جلدية مصرحة كاتبة عن السيلكون و مفسرة كل شي و كيف هو امن و ايش استخداماته ادخلو موقعها و اتطلعو بنفسكم

عادي احط اكثر من نوع على وجهي؟

اي طبعا عادي زي ما قلنا لهم استعمالات و نتايج مختلفة فما في مشكلة لو استعملتي اكثر من نوع, مثلا ممكن تبدين بالبرايمر المرطب و بعدها  تحطين برايمر التحكم بالدهون و حق المسام و بعدين المصحح على المناطق الغامق و تخلطين البرايمر المضيء مع الفاونديشن

بكذا اكون خلصت موضوع البرايمرات بجميع اشكالها و استخداماتها ان شاءالله انكم استفدتو و توضح لكم الهدف من استخدامهم

العمر الافتراضي للمكياج و تاريخ انتهائة

اهلين بنات ان شاءالله كلكم بخير

موضوعنا اليوم عن تاريخ صلاحية منتجات العناية و المكياج

كثير نتكلم عن ايش المنتجات الجديدة و الطرق الدارجة بعالم المكياج بس ما نتكلم عن تاريخ الصلاحية و العمر الافتراضي, كتبت عن هالشي ببدايتي في انستغرام بس حبيت اتوسع فيه هنا و يسير مرجع لنا

المكياج مو زي الاكل ما راح تلقين تاريخ انتهاء صلاحية واضح اللي ينحط عليه هو نهاية عمرة الافتراضي من بعد ما تفتحينة و تبدين تستعملينه لانه يتأثر بالعوامل الخارجية من هواء و بكتيريا و تتفاعل مع المكونات الموجودة بمنتجاتك

كيف نعرف العمر الافتراضي؟

 اقلبي علب المنتج بتلقين شكل علبة مفتوحة و داخلها مكتوب رقم هذا هو العمر الافتراضي لاي منتج تملكينه من بعد ما تفتحينة, الرقم هو عدد الشهور اللي يكون فيها صالح للاستعمال

يعني هنا محطوط 12 فالعمر الافتراضي له هو سنة (السنة فيها 12 شهر) و كذا طريقة الحسبة تكون بعد ما تفتحين المنتج تبدين تحسبين عدد الاشهر, يعني لو مثلا انا فتحت الكريم بتاريخ 2015-1 فلازم ارميه 2016-1

هالطريقة نشأت بأوربا بحيث انهم الزمو جميع الشركات انهم يحطون هالمعلومة على علبهم و الزمو الشركات الثانية من خارج اوربا انهم يلتزمون بهالطريقة اذا يبون يبيعونها عندهم فتطبقت على الكل و هالتاريخ مو هو الاكيد لكن يعكينى فكرة تقيبية عن متى نرمي المنتج

العمر الافتراضي المتعارف عليه لاغلب المنتجات

البودرة بمختلف انواعها شدوهات, بلشرات, برونزر و غيره سنتين -

الفاونديشن و المنتجات السائلة من 6 شهور الى سنة -

الغلوسات و الرواج من سنة الى سنتين -

الاكحل السائل و الاقلام من ستة شهور الى سنة -

اقلام الكحل و المحددات بحدود السنة -

المناكيرات من سنة الى سنتين -

المسكرة 3 شهور -

:منجتات العناية بالبشرة

تختلف طبعا فشوفو العمر الافتراضي ورى كل علبة منتج بس غالبا يكون ما بين 8 شهور الى سنة

كيف اعرف ان المنتج انتهى تاريخة؟

بعطيكم قاعدة بسيطة: المنتجات الي من مكوناتها الموية هي الي تنتهي بسرعة ليش؟ لان الموية من العوامل البيئية المساعدة لنمو البكتيريا او احتضانها زي ما احنى عارفين البكتيريا تحب الرطوبة, اما المنتجات اللي ابدا ما فيها موية زي البودرات تعيش لوقت طوييل لانها جافة ما تتكون البكتيريا فيها بسهولة تاخذ وقت طويل 

اكيد في مؤشرات توضح لنا ان هالمنتج صار مكانة الزبالة مو التسريحة مثلا تغير ريحة

 الارواج , المناكير يبدى يثقل و يلزق , لما الفاونديشن او المنتجات الكريمية بشكل عام تبدى تفصل مكوناتها عن بعض او تكتل او يسير سايل بزيادة

كيف احافظ على مكياجي؟

لا تحطينة بمكان حرارته عالية او تحت ضوء الشمس -

غسلي ايدينك قبل ما تستعملين اي شي لوجهك -

لا تشاركين منتجاتك مع الغير -

احرصي على حفظهم بمكان ناشف و نظيف -

لا تخلطين موية او اي سوائل مع مكياجك -

عقمي منتجاتك بشكل دوري, كتبت عن طريقتي بتعقيم المكياج هنا -

اذا جاك حساسية او التهاب بالعين تخلصي من المنتجات اللي كنتي تستعملينها لعينك عشان ما تكرر المشكلة او تزيد

و خلصنى موضوعونا السريع يله روحو شوفو اغراضكم و ارمو القديم

وصفات عناية منزلية سهلة و ما استغني عنها

اهلين بنات ان شاء الله كلكم تكونون بخير
موضوعنا اليوم شوي مختلف و اتمنى انه يعجبكم

حبيت اشارككم بعض الوصفات المنزلية الي اسويها لشعري و بشرتي و كلها سهله و موجودة بكل بيت لاني انسانه كسولة و ما احب الخربطة الزايدة هههههههه

خلونا نبدى بوصفات البشرة المفضلة عندي

اول وصفة مخصة للرؤوس السوداء و سرقتها من اختي كانت جاية ومعاها صحن و قالت لي بحط لك هالشي على خشمك و لما جربته انصدمت بالنتيجة و صرت اسوي هالماسك قبل اي مناسبة كبيره و هو ماسك بودرة الزنجبيل و موية الورد

هالماسك ما فيه الا مكونين اللي هم بودة الزنجبيل و موية الورد انا احط ملعقة صغيرة بودة الزنجبيل و كم نقطة من موية الورد و اخلطهم اللين ما يسير زي المعجون ( احيانا حط شوية ليمون) و امده على خشمي و انتظر 10 دقايق عشان ينشف و بعدها احركة بشكل دائري عشان اسوي تقشير للمنطقة و اغسله بموية باردة, هالماسك شوي يحسسك بتقريص لكن نتيجته رهيييبة احسن من اي غسول او لصقة توعد بأزالة الرؤوس السوداء و احيانا احطة على منطقة المسامات عشان انظفها بعمق و على اثار الحبوب و لاحظت انه صفى بشرتي و عطاها نعومه و حيوية

من فوائد الزنجبيل للبشرة: مليان بالامينيو اسد و فيتامين سي و الف , ينشط الدورة
 الدموية و يساعد على تاخر ظهور التجاعيد  ينظف بعمق و يزيل المكروبات , يعطي البشرة مرونة و حيوية (اشوف هالماسك مناسب للبشرات الدهنية و المختلطة اكثر شي لو بشرتك حساسة لا تقربين منه الزنجبيل جدا حار و قوي على البشرة و اختبري كمية قليلة على بشرتك قبل بيوم, قبل ما توزعينه على كامل وجهك) جربوه  لو بس مرة و قولو لي 

الوصفة الثانيه هي لترطيب و تهدئة البشرة و احيانا استعملها بعد ماسك الزنجبيل  

المكونات: زيت الارغان, عسل و موية ورد

هالماسك يعطي البشرة ترطيب عميق و ينورها طبعا العسل معروف بانه مضاد بكتيري طبيعي فرائع للحبوب وزيت الرغان كمان عنصر مرطب للبشرة بعمق و مليان مضادات أكسدة فيقلل من علامات التقدم بالسن و هذا يناسب كل البشرات

ثالث وصفه اسهل وحدة و ما فيها الا مكون وحد و هو الخيار

 الخيار يعطي البشرة اشاراقة و يرطبها و يبرد عليها, كمان يساعد على توحيد اللون

بس خذي كم شريحة خيار و امسحي فيها وجهك و نامي و الصباح غسليه

الحين نجي لماسكات الشعر

اول واحد بقول لكم عليه هو مقشرمنقي  لفروة الراس 

بيناسب الفروة الدهنية اكثر شي و اذا ما كان عندك شامبو منقي استعمليه عشان تنظفين  فروة راسك من تراكمات لمنتجات و هو مقشر الملح الخشن مع الليمون و زيت الزيتون او جوز الهند انا اسويه بالشهر مرتين

 بس اخلطي نص ليمونة مع ملح خشن اللي هو ملح البحر و كمية قليييلة من الزيت, على شعر ناشف و قبل الشاور فرقي شعرك اربع اقسام و ظفريهم من بداية اذنك لتحت ولا تشدين عليهم خليهم خفاف عشان يسهل عيك حط المقشر على الفروة و تحريكة بعد ما توزعينه على كل قسم فكي الظفاير و ابدي حركيه بشكل دائري بكامل الفروة و اشطفيه بالموية و استعملي الشامبو و البلسم عادي

نقس كذا بس بدال ظفيرة بكل جهة تكون ظفيرتين بكل جهة

 بتلاحظون انتعاش مو طبيعي للفروة و بيشيل كل الزويوت و تراكم المنتجات و هالشي بيعطيكم كثافة و ارتفاع للشعر عند الفروة

ثاني ماسك للشعر هو باستخدام الزيوت تقدرين تستعملين هالزيوت لحالها او تخلطينهم 

زيت الزيتون و زيت جوز الهند اثنينهم يرطبون الشعر و يعطونه لمعة صحية بس انتبهو لا تكثرون عند الفروة و ركزو بس على باقي طول الشعر

ثالث ماسك هو ماسك مرطب عميق و يعيد الحيوية لشعر (افوكادو, عسل, زيت زيتون) الافوكادو مليان زيوت طبيعية و يرطب الشعر بعمق و فيه بروتين فبيساعد بنمو الشعر حطيهم بلخلاط و خلطيهم بيدك لين يسي قومه زي البلسم و خليه على شعرك نص ساعة بس اختاري وحدة تكون مستوية عشان يصير قوامها كريمي و ممكن تستبدلينها بالموز

و بس هذي الماسكات اللي احب اسويها و ما تاخذ مني وقت لاني ما احب المكونات الصعبة و الحوسة الكثير, ان شاءالله انكم تستفيدونمنها و تجربون هالوصفات

سلسلة الاساسيات: مبادئ المصحح بشكل مبسط color correcting 101

اهلين بنات ان شاءالله كلكم بخير

موضوعنا اليوم عن المصححات, ادري ان هالشي يلخبط و البعض وسعة بشكل مبالغ شوي و غير واضح ,فاليوم بنرجع لاساسيات و بعلمكم كل لون لايش يستخدم و ايش الدرجة المناسبة لكل بشرة و مشاكلها

خلونا نبداء من الاساس و هو عجلة الالون عشان يسهل عليكم كل شي و بيسير مرجعنى الاساسي خلال هالتدوينة

اغلبكم يعرف عجلة الالوان و قاعدتها اللي هي: الالوان المقابلة لبعض تنكسل بعضها يعني مثلا الدرجات الزرقة او الخضراء يكنسلها البرتقالي و الاحمر لانه عكسها,  فابحثي عن الدرجات اللي حابة تكنسلينها ببشرتك و ايش مقابلها بهالطريقة بتسهلين على نفسك كثير بدون فلسفة احد

الحين خلينا نشوف كل لون لايش يصلح و ايش درجاته

:الوان المصححات و استخداماتها

:المصحح البرتقالي -

مثل ما قلت لكم من قبل البرتقالي يكنسل الدرجات الزرقة و الخضراء زي ما هو باين بعجلة الالوان و هذي هي الوان الهالت و المناطق الغامقة بشكل عام مثل حول الفم و اثار الحبوب بالغالب تكون مايلة للازرق او الاخضر و فيه منه عدة درجات لكل بشرة

ليش من كل لون في اكثر من درجة؟ مثل ما ان ما في فاونديشن يناسب كل بنت بالعالم نفس الشي للمصححات ما يسير بنت درجة بشرتها بيضة تحط مصحح برتقالي غامق و تتتوقع انه ما راح يترك اثر بعد الدمج مع الكونسيلر او بنت بشرتها حنطية تحط مصحح لونه مشمشي فاتح و تتوقع انه بيخفي هالتها و هو افتح من بشرتها

شيئين ضروي تحطينهم ببالك قبل ما تشترين المصحح: لون بشرتك و درجة الهالات او المناطق الغامقة عشان تنجحين باخفاء اللي ما تبين و ابراز اللي تبين

البشرات الفاتحة: و اللي هالاتها متوسطة تجيب مصحح مايل للون المشمشي مو برتقالي عشان تقدر تخفي هالاتها بشكل صحيح و اذا كانت هالاتك غامقة جيبي مشمشي غامق شوي عشان تكنسلين الهالات

البشرات الحنطية: ممكن تجيبون البرتقالي بمختلف درجاتة, لا تجيبين شي افتح من درجتك بيسير باهت و رمادي و كأنك ما سويتي شي 

البشرات السمراء: جيبو البرتقالي الغامق او المايل للحمار لانه بيعطي شويه دفئ و يكنسل الهالات بشكل كلي

ماركات كويسة: ماك, ميك اب فورايفر, ال اي غيرل, بوبي براون,نكس

:المصحح الاخضر -

ارجعو لعجلة الالوان  بتشوفون ان لاخضر يقابلة الاحمر فبنحط المصحح الاخضر على اي مكان فيه احمرار مثل الحبوب اللي توها طالعة او جوانب الانف او على الخدود حسب بشرتك و لونها و نوعها باختصار اي احمرار عندك تبين تخفينه حطي عليه المصحح الاخضر

حطي كمية قليلة بس على المنطقة اللي تحتاينها, ادمجيه و بعدين كملي مكياجك عادي

الماركات الكويسة هي: سماش بوكس, ميك اب فورايفر, ال اي غيرل, نكس

:المصحح الاصفر -

 الاصفر يستعمل عشان يعطي البشرة اشراقة و حيوية لانه مقابل البنفسجي على العجلة

و لو كانت بشرتك فاتحة و هالاتك مايلة للبنفسجي استعملية كمصحح مو لازم مشمشي لان البنفسجي يكنسله الاصفر بعلة الالوان, ممكن تحطينه بالاماكن اللي تبين تبرزينها مثل تحت العين و الجبهة و الذقن انا مرة احب احطة تحت عيني مع الكونسيلر

زي ما انتو شايفين عندها درجات بنفسجي تحت عينها فحطت الاصفر اللي يناسب بشرتها لونه فاتح و بعد الدمج عطاها اشراقة و كنسل اللون البنفسجي

كمان ممكن تستعملينه لو عندك المنطقة تحت العين داخلة شوي و في خط عندها تحطين المصحح الاصفر بس على هالمنطقة عشان تبرزينها و ما تبان داخلة 

 الاصفر في منه درجات مثل غيرة من المصححات فخذي الدرجة اللي تتناسق مع لون بشرتك لا تجيبين شي فاتح مرة و انتي سمراء بيطلع رمادي و يبهتك او شي غامق مايل للدافي و انتي بيضة عشان ما تبانين مريضة و بشرتك صفراء

شوفو كيف درجة الصفار هذي متناسقة مع لون بشرتها

ماركات كويسة: ماك, ميك اب فورايفر, ال اي غيرل,نكس

:المصحح البنفسجي -

مهو منتشر كثير هاللون من المصححات عندنا بس ارجعو شوفوه بعجلة الالوان تلقون مقابلة الاصفر فهو بيكنسل لكم صفار البشرة يعني لو كانت بشرتك تعبانة و مصفرة او ما فيها حيوية و باهته/شاحبة ممكن تحطين المصحح البنفسي على مناطق الصفار او المناطق المرتفعة مثل عظمة الخد عشان تبرزينها و تدمجينة بشكل خفيف بينور وجهك و يبينه صحي بشكل طبيعي مرة

ماركات كويسة: سماش بوكس, ميك اب فورايفر ,نكس

شوفو هالصورة شاملة لاكثر من لون و تقدرون تشوفون الشكل النهائي للبشرة كيف صار, هي استعملت الاخضر على الخدود و حول الفم و الاصفر تحت العين لان هالاتها مايلة للبنفسجي زي ما هو باين بالصورة الاولى و اخر شي البنفسجي على الاماكن اللي تبي تبرزها بشكل طبيعي و هي الحاجب و عظمة لخد. و بعد الدمج بشرتها مبينه صحية و مشرقة بشكل طبيعي

طريقة استعمال المصحح

ابدا ما انتو بحاجة كميات كبيرة من المنتج او انكم توزعونة على مساحة كبيرة, بنات حطوه بس على المنطقة اللي تبون تصححونها بكمية قليلة و ادمجوة بمكانة بتلاحظون ان الهالات او الاسمرار اختفى و بشرتك لونها طبيعي كذا يعني انتي استعملتيه صح لو مديتية بزيادة و كثرتي الكمية بشرتك بيسير لونها مث لون المصحح اللي استعملتيه لانها مو بحاجة تصحيح فبتروح قوة اللون المصحح و بسيربس لون على بشرتك ما له هدف و بيأثر على لون ااساس او الكونسيلر لما تحطينه فوقة

هالتكنيك نفسة استعمليه على اي منطقة بتحطين عليها مصحح, الذكاء مو بالكثرة الذكاء هو انه يبان بشكل طبيعي و يحقق المنتج الهدف اللي استعملتيعه عشانه, فلما تنتهين من مكياجك تبان بشرتك بلون واحد

متى احط المصحح؟

في ناس تحطة بعد الاساس و ناس قبلة بالنسبة لي انا افضل انه يكون خطوتي الثانية بعد البرايمر احط المصحح على المناطق اللي تحتاجة و ادمجه بمكانه باسفنجة مبلولة بعدين احط الفاونديشن او الكونسيلر بطريقتي المعتادة بكذا اقدر اشوف نتيته بشكل فوري و اقدر امسح لو كثرت بدون ما اخرب الاساس 

هل استعمل المصحح بشكل يومي؟

هالسؤال ما يجاوبة الا انتي اذا كانت عيوب بشرتك واضحة و ما يغطيها الفاونديشن او تبان بعد كم ساعة و هالشي يضايقك فاستعمالك للمصحح بيقلل من هالمشكلةم مو شرط نوع ثقيل في انواع خفيفة و تناسب لكل يوم و ماشاءالله الماركات لسة مستمرة بانتاج كميات و انواع مختلفة من المصححات فكل وحدة منا بتلقى شي لها

كل بنت تحتاج مصحح؟

كمان انتي الحكم بهالقرار هل عندك هالات قوية ما يغطيها الكونسيلر؟ او عيوب ما يخفيها الفاونديشن؟ احمرار بشرتك يبان بعد كم ساعة من مكياجك؟ راقبي بشرتك  و شوفي ايش تحتاجين مو شرط كل بنت يكون عندها باليت كوريكترات مختلفة الا اذا كانت محتاجتها, حاليا صار في برايمرات قوامها جدا خفيف مناسبة للي عندهم تصبغات خفيفة و تتوفرعند ميك اب فورايفر او سماش بوكس

و اغلب الماركت يدخلون المصححات في الكونسيلر او الفاونديشن فتغني البنات اللي

  يعانون من تصبغات بسيطة بشكل كبير من خطوة المصحح يعني ابد مهو شي اساسي للكل

اتمنى اني افدتكم بهالتدوينة و بسطت لكم بحر المصححات و استخداماتها, لا تنسون تكتبون لي ارائكم و اقتراحاتكم بالكومنت و اشوفكم بالتدوينة الجاية 

brand spotlight : Kat Von D

اهلين بنات ان شاءالله تكونون بخير

 بما ان سيفورا  بيطلقون اكثر من ماركة و منها كات فون دي حبيت انقل لكم تجربتي عن بعض منتجاتهم اللي جربتها عشان تاخذون فكرة 

بتنزل رسميا  بنص شهر مارس في فرع سيفورا المملكة بالرياض و شارع التحلية بجدة  وفرع الظهران مول  بالشرقية وبشهر ابريل راح تنزل بباقي الفروع كاملة

المنتجات اللي جربتها من عندهم هي الارواج السائلة, باليت الكونتور, باليت الشدوهات و الايلاينر. راح اشارككم تجربتي فيهم و هم تقريبا من اشهر منتجاتها 

اكثر شيئين احبهم بهالماركة انهم ما يختبرون على الحيوانات و ثاني شي ان كات نفسها ما تنزل شي للسوق الا و هي مجرتة و متأكدة من جودتة و ما تستعمل الا اغراضها فتكونين متأكدة ان كل شي جودتة عالية


:خلونا نبداء بالارواج السائلة

اعتبرهم من افضل الارواج السائلة من المجموعة الكبيرة اللي نزلت، الفورميلا حقتهم مرة خفيفة و كريمية ما كأني حاطة شي على شفايفي و منظرهم مخملي و ما يقعدون بين الخطوط او يطلعون شكل الشفايف مو حلو، ثباتهم عالي يظلون وقت طويل علي حتى بعد ما اكل او اشرب

هذي درجة لوليتا المشهورة

الفرشة حجمها حلو و مناسب للتوزيع و الكمية اللي تطلع معاها مناسبة جدا لانك تمدين
 اللون بكل راحة, و هاللون لوليتا حلو مررة يناسب الكل صدق الكل ايش ا كان لون بشرتك بيمشي عليك و حلو لاي وقت و على اي لوك

بيكون سعر الاواج السائلة 100 ريال

نجي لبالبت الايشدو 
الالوانها ترابية و تجي بشكل كانها مقسمة لثلاث باليتات زي ما انتو شايفين الالوان هذي اساية لكل بنت سواء مبتدئة او مترسة للمكياج لانك تقدرين تستعلملينها بشكل يومي لمكياج بسيط او مكياج ثقيل

الايشدو كله مات و قوامهم مخملي الالوان قوية جدا و واضحة من اول مسحة بدون برايمر و كل الالوان بنفس الجودة مثل الزبدة
 تتناثر شوي و هالشي طبيعي لاي لون قوي لان كل ما كانت جزيئات البودرة  ناعمة تزيد نسبة قوة اللون, يندمجون بسهولة و بعض الالوان تنفع للحاجب و مع انهم مات ابدا ما يبانون ناشفين على العين او مثل الطباشير

شوفو قوة الالوان و نعومتها بالسواتش, ما في اختلاف بجودتهم زي ما قلت لاحظو اللون الابيض كيف قوي و ناعم و الاسود نفس الشي, يندمجون بكل سهولة و ابدا ما يتعبون لما تبنين الالوان فوق بعض, الصراحة من افضل الشدوهات اللي استعملتها ببحياتي و اكيد ارجع اشتريها

بيكون سعرها 220 ريال

باليت الكونتور
بأختصار ما في اختلاف بمستوى الجودة, انا جربت كثير باليتات كونتور لكن من جبت هذي ما استعمل غيرها, البودرة ناعمة بشكل مو طبيعي انعم من الشدوات و تندمج لدرجة انها تسير جزء من بشرتك ما تقعد فوقها كطبقة مزعجة

اللون الاصفر اخلطة مع البرتقالي عشان انور تحت عيني و اكنسل الهالات بوقت وحد, تعطيني نتيجة فورية و ما تقعد بالخطوط ولا تنشف منطقة تحت العين 
و ممكن احط البرتقالي بس على اماكن اسمرار حول الفم بدال المصحح

للكونتور ابدى بالدرجات الدافية على اماكن الكونتور بفرشة كبيرة بعدين استعمل اللون الجاي على رمادي للكونتور فأطلع بنتيجة طبيعية و كونتور ناعم مهو واضح بشكل حاد

سعرها بيكون 220 ريال


الايلاينر السائل
بدون مبالغة بنات كل وحدة منكم لازم تشترية لو على الاقل مرو وحدة

يعتبر واحد من منتجاتها الافضل مبيعا و بما ان كات تاتو ارتست فالدقة شي مهم عندها هذا القلم دقييييق لابعد الدرجة بالرسم يطلع لك كمية كحل مناسبة للرسم و جدا سهل و سلس الرسم فيه بسبب راس فشتة تقدرين تكونين فيه لاينر خفيف او ثقيل و تضبطين بداية الايلاينر و تحددين اخرة , سوادة فاحم و قوي , ثابت طول اليوم و ضد الموية, شكلة ما يتغير خلال اليوم لا ينشف ولا يسيح ولا يتقشر

من الاشياء اللي حبيتها فيه هو ان الغطى حقه محكم ما يدخل اي هواء عليه فتظل الفرشة رطبة و يدوم لوقت طويييل

سعرة بيكون 100 يال

و بكذا اكون خلصت معاكم الريفيو السريع عن بعض منتجات كات فون دي اللي بتنزل عندنا و تكونون اخذتو فكرة عن الاسعار و جودة المنتجات



اشوفكم بتدوينة جديدة و لا تبخلون علي بتعليقاتكم اللي تسعدني