وصفات عناية منزلية سهلة و ما استغني عنها

اهلين بنات ان شاء الله كلكم تكونون بخير
موضوعنا اليوم شوي مختلف و اتمنى انه يعجبكم

حبيت اشارككم بعض الوصفات المنزلية الي اسويها لشعري و بشرتي و كلها سهله و موجودة بكل بيت لاني انسانه كسولة و ما احب الخربطة الزايدة هههههههه

خلونا نبدى بوصفات البشرة المفضلة عندي

اول وصفة مخصة للرؤوس السوداء و سرقتها من اختي كانت جاية ومعاها صحن و قالت لي بحط لك هالشي على خشمك و لما جربته انصدمت بالنتيجة و صرت اسوي هالماسك قبل اي مناسبة كبيره و هو ماسك بودرة الزنجبيل و موية الورد

هالماسك ما فيه الا مكونين اللي هم بودة الزنجبيل و موية الورد انا احط ملعقة صغيرة بودة الزنجبيل و كم نقطة من موية الورد و اخلطهم اللين ما يسير زي المعجون ( احيانا حط شوية ليمون) و امده على خشمي و انتظر 10 دقايق عشان ينشف و بعدها احركة بشكل دائري عشان اسوي تقشير للمنطقة و اغسله بموية باردة, هالماسك شوي يحسسك بتقريص لكن نتيجته رهيييبة احسن من اي غسول او لصقة توعد بأزالة الرؤوس السوداء و احيانا احطة على منطقة المسامات عشان انظفها بعمق و على اثار الحبوب و لاحظت انه صفى بشرتي و عطاها نعومه و حيوية

من فوائد الزنجبيل للبشرة: مليان بالامينيو اسد و فيتامين سي و الف , ينشط الدورة
 الدموية و يساعد على تاخر ظهور التجاعيد  ينظف بعمق و يزيل المكروبات , يعطي البشرة مرونة و حيوية (اشوف هالماسك مناسب للبشرات الدهنية و المختلطة اكثر شي لو بشرتك حساسة لا تقربين منه الزنجبيل جدا حار و قوي على البشرة و اختبري كمية قليلة على بشرتك قبل بيوم, قبل ما توزعينه على كامل وجهك) جربوه  لو بس مرة و قولو لي 

الوصفة الثانيه هي لترطيب و تهدئة البشرة و احيانا استعملها بعد ماسك الزنجبيل  

المكونات: زيت الارغان, عسل و موية ورد

هالماسك يعطي البشرة ترطيب عميق و ينورها طبعا العسل معروف بانه مضاد بكتيري طبيعي فرائع للحبوب وزيت الرغان كمان عنصر مرطب للبشرة بعمق و مليان مضادات أكسدة فيقلل من علامات التقدم بالسن و هذا يناسب كل البشرات

ثالث وصفه اسهل وحدة و ما فيها الا مكون وحد و هو الخيار

 الخيار يعطي البشرة اشاراقة و يرطبها و يبرد عليها, كمان يساعد على توحيد اللون

بس خذي كم شريحة خيار و امسحي فيها وجهك و نامي و الصباح غسليه

الحين نجي لماسكات الشعر

اول واحد بقول لكم عليه هو مقشرمنقي  لفروة الراس 

بيناسب الفروة الدهنية اكثر شي و اذا ما كان عندك شامبو منقي استعمليه عشان تنظفين  فروة راسك من تراكمات لمنتجات و هو مقشر الملح الخشن مع الليمون و زيت الزيتون او جوز الهند انا اسويه بالشهر مرتين

 بس اخلطي نص ليمونة مع ملح خشن اللي هو ملح البحر و كمية قليييلة من الزيت, على شعر ناشف و قبل الشاور فرقي شعرك اربع اقسام و ظفريهم من بداية اذنك لتحت ولا تشدين عليهم خليهم خفاف عشان يسهل عيك حط المقشر على الفروة و تحريكة بعد ما توزعينه على كل قسم فكي الظفاير و ابدي حركيه بشكل دائري بكامل الفروة و اشطفيه بالموية و استعملي الشامبو و البلسم عادي

نقس كذا بس بدال ظفيرة بكل جهة تكون ظفيرتين بكل جهة

 بتلاحظون انتعاش مو طبيعي للفروة و بيشيل كل الزويوت و تراكم المنتجات و هالشي بيعطيكم كثافة و ارتفاع للشعر عند الفروة

ثاني ماسك للشعر هو باستخدام الزيوت تقدرين تستعملين هالزيوت لحالها او تخلطينهم 

زيت الزيتون و زيت جوز الهند اثنينهم يرطبون الشعر و يعطونه لمعة صحية بس انتبهو لا تكثرون عند الفروة و ركزو بس على باقي طول الشعر

ثالث ماسك هو ماسك مرطب عميق و يعيد الحيوية لشعر (افوكادو, عسل, زيت زيتون) الافوكادو مليان زيوت طبيعية و يرطب الشعر بعمق و فيه بروتين فبيساعد بنمو الشعر حطيهم بلخلاط و خلطيهم بيدك لين يسي قومه زي البلسم و خليه على شعرك نص ساعة بس اختاري وحدة تكون مستوية عشان يصير قوامها كريمي و ممكن تستبدلينها بالموز

و بس هذي الماسكات اللي احب اسويها و ما تاخذ مني وقت لاني ما احب المكونات الصعبة و الحوسة الكثير, ان شاءالله انكم تستفيدونمنها و تجربون هالوصفات