Search This Blog

Saturday, February 20, 2016

سلسلة الاساسيات: كل شي تحتاجين تعرفينة عن الفاونديشن foundation basics

اهلين بنات انشاءالله كلكم بخير


موضوعنا اليوم بيفيد المبتدئات اكثر شي, بكتب لكم عن كل شي يخص الفاونديشن من الاندرتون لطريقة الاختيار  للانواع الموجودة بالسوق و الانسب لكل بشرة فجيبو قهوة او سناك لاننا مطولين شوي




اول شي خلينا نبدئ بالاندرتون, اذا عرفتو الاندرتون حقكم بيسهل عليكم اختيار الدرجة اللي تناسبكم مو بس بالمكياج حتى تقدرين تعرفين درجات الالوان اللي تناسبك باللبس, الاكسسوار, و حتى الوان صبغة الشعر اللي تصلح لك

ايش هو الاندرتون؟ هو اللون او الالوان اللي تحت سطح البشرة و تظهر بنور الشمس او الاضاءة القوية زي لما نقول ( هذي بشرتها على صفار او خضار او حمراء احنى هنا نتكلم عن الاندرتون)  و الطريقة سهلة

 كل اللي عليك تسوينه هو انك تروحين لاي منطقة انارتها عالية او اعتمدي على نور الشمس و شوفي يدك 



اذا عروقك كانت خضراء او تميل الزيتوني -
بشرتك فيها لمحه صفار او مشمشي -
تبرز عليك المجوهرات الذهبية اكثر من الفضية -
ما تحرقك الشمس بسهولة -
 بشرتتك متوسطة تميل للسمار -

يعني انتي اندرتونك دافي ميلي للاساس اللي يكون على صفار و ابتعدي من اللي يميل للزهري لانه ممكن يبهتك او يبينك رمادية
  و ما فيك حياة و هذا نوع اغلب البشرات الخليجية و العربية

اذا عروقك تميل للازرق او البنفسجي  -
تنحرقين بسهولة من الشمس -
بشرتك تحمر بسهولة -
المجوهرات الفضية تبرز عليك اكثر من الذهبية -
بشرتك تكون فاتحة اكثر الاحيان -

فأنتي اندتونك بارد و يناسبك اي اساس يميل للزهري او محايد  

اذا صعب تميزين بين الالوان و حسيتي ان فيك زراق و خضار -
سهل انك تسوين تان -
بشرتك ما تحمر ولا فيها صفار -
كل المجوهرات (فضي او ذهبي) يبرزون عليك -

فأنتي اندرتونك محايد و يناسبك اي شي سواء على صفار او وردي


بعد ما عرفنا الاندرتون خلونا نشوف مسمياته بالفاونديشن





هالصورة بتختصر الكثير, زي ما انتو شايفين بأول قسم تظهر بعض الكلمات الاساسية اللي نشوفها بأسماء الفاونديشنات 
  sand , caramel , warm , honey , bronze , peach , tan , earth مثل  

هذي المسميات هي دلالات بسيطة ان هالدرجات بتكون الوانها دافية او مايلة للصفار فتناسب اللي اندرتونهم دافي 

اما الجزء السفلي دلالات الالوان المناسبة للبشرات اللي اندرتونها بارد
satin,  fair ,rose, neutral, beige


الحين فهمنا الاندرتون و الدلالات بالأسامي نجي لاختيار الصحيح للون الفاونديشن 

بس قبل ما ابدى حابة انوه عن شي صغير و هو سؤال متكرر كثير (ايش افضل فاونديشن؟) هالسؤال يجلطني ههههههههه
لان ما في شي اسمه افضل فاونديشن ليش؟ لان كل بشرة تتقبل الفاوديشن بشكل مختلف حتى لو كنا من نفس نوع البشرة ممكن انا احب اساس معين غيري تذمة و هي نوع بشرتها مثلي ، و هذا ما يعني ان الأساس كويس او سيء لهالتقيم يدخل فيه اشياء كثيرة و عوامل مختلفة منها تقبل بشرتي للفاونديشن, نوع البرايمر, تحسس بشرتي لبعض المواد, التغطية اللي ابيها, قوام الفاونديشن, و حتى نوع الفرشة او طريقة وضعه على البشرة

و لو كان في واحد يناسب الكل ما كان تنافست الشركات على صناعة انواع و اشكال و بتركيبات مختلفة. بنات لا تاخذون على كلام احد مين ما كان الا قبل التجربة على بشرتكم عشان تتأكدون انها تتقبلتها و ما تسبب حبوب او تحسس. اعرفو اساسيات و احتياجات بشرتكم و اعتمدو عليها كدليل يقودكم لأختيار الفاونديشن المناسب لكم

  نوع الفونديشن المناسب لبشرتك

البشرة المعرضة للحبوب: اختاري شي خالي من الزيوت و ما يكون قوامه ثقيل عشان ما يسد المسام و يكون حبوب زيادة, لا تستعملين يدك لما تحطينه و احرصي على نظافة فرشك عشان ما يسير فيها بكتريا و تطلع لك حبوب 

البشرة الجافة: اختاري فاونديشنات كريمية و مرطبة, حاولي ان قوامها يكون خفيف و مائي عشان ما تمسك بالمناطق الجافة و تبان بشرتك طبيعية

البشرة الدهنية او المختلطة: احرصي ان يكون الفاونديشن بدون زيوت و يفضل ان تغطيتية طبيعية او مات وتأكدي انك  تستعملين برايمر للتحكم بالدهون و مظهر المسام

نصيحة: لا تاخذين فاونديشن على كلام صديقتك او البائعة لان كل بشرة تختلف عن الثانية و اللي يمشي على غيرك ممكن 
 ما يمشي عليك ابحثي عن الفاونديشن على حسب نوع بشرتك و اقري عن الاشياء المعروفة و اللي تناسب نوع بشرتك و جربية هذا اهم شي


اختيار لون الفاونديشن بالسوق

- خذي تيستر و لا تعتمدين على اللون بالعلبة بس و امسكيه بيدك شوفي قوامه و كثافته, اذا ما عطوك تستر جيبي علبة عدسات او علب صغيرة يبيعونها بوايتس و الدانوب و حتى سيفورا او يوفرونها و ابدا لا تستحون بنات هذا من حقكم انتو بتدفعون بالشي فجربو بالطريقة اللي تريحكم خصوصا الفاونديشن هذا اهم جزء بالمكياج 

- عشان تختارين اقرب لون لك جربي الفاونديشن بدون ما تكونين حاطة شي على وجهك و جربي اكثر من درجة عند عظمة الفك بالمنطقة اللي بين الخد و القبه (مثل الصورة) و شوفي اكثر لون يندمج مع بشرتك عشان ما يبان انك حاطة قناع. خذي احد معاك يساعدك بالحكم او استشيري لموظفة لو حسيتيها فاهمة





- لا تثقين بأضاءة المحل, احيانا نشتري اساس حلو لونه بالسوق بس بالبيت تكون الدرجة مختلفة تماما هذا لان اضاءة لمحل تلعب دور فحاولي تختارين الدجة باضاءة طبيعية. انا اطلع برى المحل و اشوف الدرجة بالنور العادي و خلي الفاونديشن يقعد على بشك لان في بعض الماركات الفاونديشن يتأكسد فتغمق دجته و بكذا ما تجيبين اللون الصح

- لا تحاولين تغمقين او تقتحين نفسك و تلعبين بالالوان, بتبانين باهتة و رمادية او كأن وجهك وصخ, العبي بس بالبرونزر و البلش عشان يبان الشكل طبيعي  


مشاكل الفاونديشن

كلنا يسير لنا مشاكل مع الفاونديشن نشتري بالسوق او اونلاين و ما يناسبنا لما نجربة بالبيت


 بما ان ما عندنا سياسة ترجيع هنا و اغلب الاحيان نتورط بالفاونديشن و نتركة عندنا بدون استعمال حبيت اشارككم بنصايح بسيطة تخليكم تستعملون الفاونديشن و تخلونه يناسبكم


تعديل الدرجة:

نفرض انك شريتي اساس و كان غامق او فاتح عليك بس الاندرتون صح ايش تسوين؟
- اذا كان افتح منك بكم درجة ممكن تستعملينه كأضاءة لتحت العين و الجبهة و الذقن زي الكونسيلر الفاتح

- اذ كان اغمق منك بكم درجة ممكن تستعملينه بالصيف لما تسوين تان او تخلطينة مع اساس ثاني او تستعملينه ككونتور خفيف كريمي عشان تحددين ملامحك بشكل طبيعي.

- هذي اسهل طريقة للبنات اللي يتغير لونهم كثير بسبب التان او صعب عليهم اختيار دجةالفاونديشن, بودي شوب نزلو هالمنتجين لتعديل الوان الاساس (تفتيح او تغميق) ما لهم اي تأثير على قوام الفاونديشن. متوفرين عندنا ممكن تجيبونهم و بيحلون ازمة الدرجات 

في درجتين وحدة تغمق و الثانية تفتح


تعديل الاندرتون:

خلونا نفرض انك شريتي فاونديشن بس الاندرتون ما ناسبك ايش تسوين؟

- الاندرتون وردي بس انتي اندرتونك اصفر: بس جيبي برايمر او كوركتر (مصحح) اصفر و حطيه على بشرتك قبل الفاونديشن او اخلطي الكمية اللي بتستعملينها على سطح نظيف او يدك, المصحح بيعادل اللون الوردي و الاندرتون بيسير مناسبك

- الاندرتون اصفر بس انتي تبينه وردي: نفس الفكرة بمصحح وردي او ليلكي اخلطيه بالفاونديشن و بيتعدل الاندرتون.

- اشياء ثانية مممكن تسوينها اذا الاندرتون ما ناسك , لو كان على وردي اخلطي معاه بلش كريمي او بودرة او حتى شدو كسريه و اخلطية مع الفاونديشن و بيسير عندك بلشر كريمي خفييف و طبيعي.

- لو كان الفاونديشن على صفار ممكن تخلطين معاة لمعه منثورة او شدو لمعه ما تستعملينه و يسير عندك اضاءة سائله للوجه و الجسم. 


و كذا نكون خلصنى من هالتدوينة ان شاءالله انها تكون شاملة و المعلومات افادتكم و حبيتوها, لا تنسون تسون فولو للمدونة عشان يصولكم الجديد (الزر فوق بالجهة اليسار) و شاركوني ارائكم  بالكومنتات و ارسلوها للبنات اللي بيفيدهم هالموضوع

3 comments:

  1. طيب انا عروقي خضرا بس انحرق وتحمر بشرتي من الشمس وبشرتي فاتحه هذا يعني اندرتوني محايد ؟

    ReplyDelete
    Replies
    1. لا اذا عروقك خضراء فأندرتونك اصفر, بشرتك تحمر و تتأثر من الشمس بسرعة بسبب انها فاتحة ما له دخل الاندرتون كل ما اسمرت البشرة تزداد صبغة الميلامين فتزداد قوة تحمل البشرة للعوامل الخارجيه عشان كذا البشرات شديدة السمار ما تشيخ بسرعة و لا تتأثر بالشمس و غيرها من عوامل

      اهم شي يوضح الاندرتون هو العروق اكثر من اي شي ثاني

      Delete
  2. سالفة الاندرتون الناس يصعبونها بزيادة بس انتي شرحتيها بشكل بسيط وواضح
    الفاونديشن شي حساس خاصة ان البشرة هي اهم شيء بالمكياج وتلعب اكبر دور بالنتيجة النهائية
    شكرا لمجهودك حبيبتي كفيتي ووفيتي :)

    ReplyDelete